Halyq aldyndaǵy esep berý kezdesýinde Almaty ákimi Baqytjan Saǵyntaev 2020 jyldyń qorytyndysy boiynsha megapolistiń ekonomikalyq kórsetkishteriniń ósýi qamtamasyz etilgenin atap ótti, dep habarlaidy QazAqparat.
Ótken jylǵy áleýmettik-ekonomikalyq damý qorytyndylary týraly derekti filmde aitylǵan málimetterge sáikes, KVI boiynsha sanitarlyq-epidemiologiialyq jaǵdaidyń turaqtanýy Almaty ekonomikasynyń bazalyq salalarynda ósýdi qamtamasyz etýge múmkindik berdi.
Mysaly, ónerkásiptiń 4,6% - ǵa ósýi qamtamasyz etildi, qurylys jumystarynyń kólemi 10,6% - ǵa ulǵaidy, turǵyn úidi paidalanýǵa berý-14,2% - ǵa, bailanys qyzmetteriniń kólemi 8,2% - ǵa ósti.
«Biz teris (keri) stsenariidi iske asyrýǵa jol bermedik jáne is júzinde barlyq ekonomikalyq kórsetkishterdi arttyrdyq. Saýdadaǵy, tasymaldaýdaǵy jáne qoimalarda saqtaýdaǵy quldyraýdyń ekonomikanyń basqa salalaryndaǵy ósimmen ótelýine qol jetkizdik. Sonymen qatar, biz jańa perspektivaly sektorlardy – tsifrlandyrý men smart indýstriiany, kreativti ekonomika men týrizmdi damytýǵa serpin bere aldyq», - dedi Baqytjan Saǵyntaev.
Byltyr Almatyda 2,4 mln sharshy metrden astam turǵyn úi paidalanýǵa berildi. Negizgi kapitalǵa salynǵan investitsiialar kólemi naqty kólemniń 17,2% - ǵa ósýimen 971,2 mlrd teńgege jetti. 76,3 myń jańa jumys orny quryldy, onyń ishinde memlekettik baǵdarlamalar boiynsha – 46,3 myń. Biyl 50 myńǵa jýyq jumys ornyn qurý josparda.
Áleýmettik qoldaýǵa erekshe kóńil bólinbek. 28 myńǵa jýyq múmkindigi shekteýli adam ońaltýmen jáne áleýmettik qyzmettermen qamtamasyz etiledi.
