Búgin Qazaqstan Respýblikasy Úkimetiniń otyrysynda Premer-Ministr Baqytjan Saǵyntaev kún tártibiniń máselelerin qarastyrar aldynda órt kezinde qaza tapqan bes balanyń ata-anasy men týǵan-týystarynyń qaiǵy-qasiretine ortaqtasyp, kóńil aitty.
Jan túrshigerlik jaǵdai Astanada 4 aqpan kúni oryn alǵan edi.
«Búgingi otyrysymyzdy ótken jeksenbide, dúisenbige qaraǵan túnde bolǵan Astanadaǵy qaiǵyly oqiǵadan bastaǵym kelip otyr. Bul - bir otbasynyń basyna túsken aýyr qaiǵy. Ai-kúnniń amanynda bes birdei balasynan aiyrylyp qalǵan ata-anasyna Qudai kúsh-qýat bersin. Marqum bolǵan balalardyń ata-anasyna, týǵan-týystaryna, barsha aǵaiyndaryna qaiǵyryp, kóńil aitamyz», — dedi B. Saǵyntaev.
Astana qalasynyń ákimi B. Sultanovtyń jáne QR ishki ister ministri Q. Qasymovtyń atalǵan otbasyǵa qoldaý kórsetý boiynsha atqarylyp jatqan jumystar men aldaǵy ýaqytta osyndai jaǵdailardyń oryn almaýy úshin qabyldanyp jatqan sharalar týraly baiandamalary tyńdaldy.
QR Premer-Ministri B. Saǵyntaev aldaǵy táýlikterde birqatar óńirlerde kúnniń qatty sýytatynyna orai, ákimdikterdiń, órt sóndirý jáne tótenshe jaǵdailar qyzmetteriniń nazaryn órt qaýipsizdigi máselesine aýdardy. Óitkeni, jylý jelilerinde jylý berý temperatýrasy artady, jeke úilerde pesh jaǵý da kúsheie túsedi. Sondyqtan, qaýipsizdik tehnikasynyń saqtalýyna erekshe nazar aýdarý tapsyryldy.
QR Ishki ister ministrligine jergilikti atqarýshy organdarmen birlesip, jylý berý maýsymy aiaqtalǵansha órt qaýipsizdigi ailyǵyn qaita bastaý tapsyryldy. Jylý men energiia beretin barlyq uiymdar, ákimdikterdiń turǵyn-úi kommýnaldyq qyzmetteri tutynýshylardy jetkilikti deńgeide jylýmen jáne jaryqpen qamtamasyz etýi tiis. Barlyq qyzmetter irkilissiz jáne apatsyz jumys isteýi qajet. Bul máseleni ákimdikterge erekshe baqylaýǵa alý tapsyryldy.
Sonymen qatar, oblys ákimdikteri men QR IIM-ge qaiǵyly oqiǵalardyń aldyn alý maqsatynda jeke úilerdegi órt qaýipsizdigine júrgiziletin tekserister sapasyna erekshe kóńil bólý tapsyryldy. Qatań talap bolýy tiis.
Barlyq quqyqtar qorǵalǵan. inform.kz belsendi siltemeni paidalanyńyz https://www.inform.kz/kz/ukimet-basshysy-ortten-kaza-tapkan-5-balanyn-ata-anasyna-konil-aytty_a3494961
