Búgin QR Premer-Ministri Baqytjan Saǵyntaev Atyraý oblysyna keldi, dep habarlaidy "Ult aqparat".
Memleket basshysynyń tapsyrmasymen QR Premer-Ministri Baqytjan Saǵyntaev Prezidenttiń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» Joldaýlary men «Bes áleýmettik bastamasynyń», sondai-aq memlekettik jáne salalyq baǵdarlamalardyń júzege asyrylý barysymen tanysý úshin Atyraý oblysyna keldi.
Jumys sapary barysynda birqatar ónerkásiptik nysandardy aralaý josparlanǵan. Bul - «Ulttyq indýstriialyq munai-himiia tehnoparki» arnaiy ekonomikalyq aimaǵynda ornalasqan polietilen jabyndar shyǵaratyn zaýyt pen gaz týrbinaly elektr stansasy; «Aqtóbe - Atyraý - Astrahan» avtojolynyń bir bóligi bolýy tiisti Oral ózenindegi kópir; «Tsifrlyq Qazaqstan» jobasy aiasynda júzege asyrylyp jatqan «Embimunaigaz» AQ-daǵy ziiatkerlik ken orny.
Baqytjan Saǵyntaev «SP Saraishyq» JShS mal sharýashylyǵy keshenine barady, onda AÓK damytýdyń memlekettik baǵdarlamasynyń iske asyrylý barysymen jáne aýyl sharýashylyǵy kásipkerligin damytý boiynsha qabyldanyp jatqan sharalarmen tanysady.
Atyraý oblysynyń stýdent jastarymen kezdesýde Prezidenttiń bes áleýmettik bastamasyn júzege asyrý máseleleri, atap aitqanda, bilim alýdyń qoljetimdiligin arttyrý jáne stýdentterdiń jataqhanadaǵy jaǵdailaryn jaqsartý máseleleri talqylanady.
Oblystyń densaýlyq saqtaý júiesiniń qyzmetkerlerimen kezdesý ótkizý josparlanǵan. Munda salany qaita retteý, MJÁ tetigi arqyly jekemenshik meditsinalyq qyzmetter sektoryn damytý jónindegi sharalar qaralatyn bolady.
Oblysty áleýmettik-ekonomikalyq damytý, 2018 jylǵa arnalǵan óńir ekonomikasynyń damýyna arnalǵan maqsatty kórsetkishterge qol jetkizý, shaǵyn nesie berýdi kóbeitý jáne kásipkerlikti damytý máseleleri oblystyń jumys aktivimen jáne biznes ókilderimen kezdesýde talqylanady.
Esterińizge sala keteiik, bul biylǵy jylǵa el óńirleri boiynsha úshinshi jumys sapary. Buǵan deiin Baqytjan Saǵyntaev Ońtústik Qazaqstan jáne Qyzylorda oblystaryna jumys saparymen baryp qaitty.
