Almaty ákimi Baqytjan Saǵyntaev sybailas jemqorlyqqa qarsy is-qimyl máseleleri boiynsha keńeitilgen keńes ótkizdi, dep habarlaidy "Ult aqparat".
Keńeske memlekettik, quqyq qorǵaý jáne áskeri organdardyń basshylary, sýdialar korpýsynyń ókilderi, máslihat depýtattary, joǵary oqý oryndarynyń rektorlary, meditsina mekemeleriniń basshylary, mektep pen kolledj direktorlary qatysty.
Keńesti ashqan Baqytjan Saǵyntaev Memleket basshysynyń sybailas jemqorlyqqa qarsy kúres memlekettik saiasattyń basym baǵyty bolyp belgilengenin atap ótti.
Alǵash ret zań deńgeiinde basshylardyń sybailas jemqorlyqta quqyq buzýshylyqtary úshin derbes jaýapkershilik bekitildi.Sondai-aq basshynyń ujymda sybailas jemqorlyqtyń aldyn alý boiynsha óz mindetterin júieli túrde oryndamaǵany úshin jáne sybailas jemqorlyqtyń aldyn alý boiynsha sharalar qoldanbaǵany úshin jaýapkershilik engizilgen.
«Bizdiń maqsatymyz – qoǵam, biznes jáne tutastai alǵanda adamdardyń ómiri sybailas jemqorlyqtan ada bolýǵa jaǵdai jasaý», – dedi qala ákimi Baqytjan Saǵyntaev. Buǵan qosa sybailas jemqorlyqqa qarsy is-qimyldyń tiimdiligi ýaqtyly ári úilestirilgen bolý kerektigin aitty.
Almaty qalasy jemqorlyqqa qarsy qyzmetiniń basshysy Qairat Súntaev qaladaǵy sybailas jemqorlyqtyń ahýaly týraly baiandap berdi.
«Biz burynǵydai ádildik pen zańdylyqty alǵa qoiyp, árbir sybailas jemqorlyq faktisine printsipti jáne ymyrasyz qaraityn bolamyz», – dep atap ótti qalalyq sybailas jemqorlyqqa qarsy vedomstvonyń basshysy.
Jiyn barysynda qala ákimi memlekettik organdardyń basshylaryna sybailas jemqorlyqqa qarsy is-qimyl salasyndaǵy jumysty kúsheitýdi, «Almaty – adaldyq alańy» jobasyn jandandyrý jáne halyqqa quqyqtyq kómek kórsetetin «Meiirimdilik akseleratory» qoǵamdyq qozǵalysyn qoldaý boiynsha birqatar tapsyrmalar berdi.
