Búgin Astanada Qazaqstan Respýblikasynyń Premer-Ministri Baqytjan Saǵyntaev pen Qyrǵyz Respýblikasynyń Prezidenti Sooronbai Jeenbekov ekijaqty saýda-ekonomikalyq yntymaqtastyqty damytý jáne óńirlik ári shekara boiyndaǵy ózara is-qimyldy nyǵaitý máseleleri boiynsha kezdesý ótkizdi, dep habarlaidy "Ult aqparat" primeminister.kz saityna silteme jasap.
Baqytjan Saǵyntaev osy sátti paidalanyp, Sooronbai Jeenbekovty Qyrǵyzstandaǵy prezidenttik sailaýdaǵy jeńisimen quttyqtady.
Kezdesý barysynda keshe Astanada Qazaqstan Prezidenti Nursultan Nazarbaev pen Qyrǵyzstan Prezidenti Sooronbai Jeenbekov arasynda jasalǵan kelisimderdi júzege asyrý barysy, sondai-aq, ekijaqty ekonomikalyq yntymaqtastyqtyń jol kartasy aiasynda is-sharalardy júzege asyrý máseleleri talqylandy.
Saýda-ekonomikalyq yntymaqtastyqtyń ózekti máselelerine jáne ony odan ári arttyrý áleýetine airyqsha nazar aýdaryldy. Kezdesý barysynda, sondai-aq, Qazaqstan-Qyrǵyzstan óńiraralyq forýmyn ótkizý, Qazaqstan men Qyrǵyzstannyń iskerlik keńesin qurý arqyly óńirlik jáne shekara mańyndaǵy ózara is-qimyldy nyǵaitý mańyzdylyǵy atalyp ótti.
Aita keteiik, biyl Qazaqstan men Qyrǵyzstan arasyndaǵy taýar ainalymynyń kólemi 2016 jyldyń osy kezeńimen salystyrǵanda 13,3%-ǵa ósip, $598 mln qurady.
Qazirgi tańda ekijaqty ekonomikalyq yntymaqtastyq jónindegi Jol kartasynyń 10 operativti sharasy júzege asyrylyp, jyl sońyna deiin 13 is-sharany oryndaý qarastyrylǵan. Kartanyń qalǵan tarmaqtary boiynsha uzaq merzimdi sipattaǵy jumystar jalǵastyrylyp jatyr.
