Qazaqstan premer-ministri Baqytjan Saǵyntaev qyrǵyz delegatsiiasymen júrgizilgen kelissózderdiń qorytyndysy boiynsha málimdeme jasady, - dep habarlaidy "Ult aqparat" Úkimet basshysynyń saityna silteme jasap.
QR úkimetiniń basshysy bul sapardyń qyrǵyz tarapynyń bastamasymen ótken telefon arqyly áńgimelesýdiń qorytyndysy boiynsha bolǵanyn aitty.
"Qazir ǵana Qyrǵyzstannyń vitse-ministri Sapar Isakov bastaǵan resmi delegatsiiasymen kelissóz aiaqtaldy. Bul 30 adamnan turatyn komanda, osynyń arqasynda ekonomikalyq máselelerdiń keń spektri boiynsha naqtyly áńgime júrgizý múmkin boldy. Birinshiden, biz ekijaqty ekonomikalyq qatynastardyń problemalyq máselelerin talqyladyq. Bul elderimizdiń shekara, kólik, fitosanitarlyq jáne veterinarlyq baqylaý salalaryna qatysty", - dedi Saǵyntaev.
Onyń aitýysha, EAEO men DSU erejeleri men normalaryna sáikes keden jáne salyq ákimshiliktendirýine qatysty problemalyq máseleler qarastyrylǵan.
"Mysaly, bizdiń keden organdarymyz qyrǵyz importtaýshylarynyń Qytaidan Qazaqstan territoriiasy arqyly tranzitpen ótetin taýarlardy jalǵan málimdeý derekterin anyqtap jatyr. Osynyń kesirinen biz tikelei shyǵynǵa batyp otyrmyz. Qyrǵyz tarapy osy máselelermen kelisti. Premer-ministr Sapar Isakov Qyrǵyzstannyń óz mindetterin oryndaýyna bailanysty problemalardy konstrýktivti jolmen sheshýge, sondai-aq, Eýraziialyq ekonomikalyq odaq keńistigindegi ekonomikalyq múddelerdi saqtaýǵa kepil boldy", - dedi QR premer-ministri.
"Ekinshiden. Kelissóz qorytyndysy boiynsha Qazaqstan men Qyrǵyzstannyń premer-ministrleriniń birinshi orynbasarlarynyń tóraǵalyǵymen jumys tobyn qurý týraly sheshim qabyldandy. Jumys toby bes jumys kúni ishinde birikken "Jol kartasyn" jasaýy qajet", - dep atap ótti Baqytjan Saǵyntaev.
"Jol kartasyn" qabyldaǵannan keiin taraptar qol jetkizgen kelisimderdi tolyqtai oryndaýǵa mindetti bolady. "Sondai-aq, biz 19 qazannyń 00.00-inen bastap elderimizdiń arasynda memlekettik shekaradan ótýdiń tártibi bolady, ásirese Qordaida myna kategoriialarǵa: jeke júgi bar jeke tulǵalarǵa; jolaýshylar tasymaldaýmen turaqty túrde ainalysatyn avtokólik quraldaryna, jeńil kólikterge; bos júk kólikterine", - dedi ol.
Aita keteiik, keshe Astanaǵa keshke taman Qyrǵyzstan pespýblikasynyń premer-ministri Sapar Isakov bastaǵan úlken ókildik delegatsiia keldi. Qyrǵyzstan delegatsiiasynyń quramynda birinshi vitse-premer-ministr T. Abdyǵulov, syrtqy ister ministri E. Abdyldaev, qarjy ministri A. Qasymáliev, ekonomika ministri A. Novikov, memlekettik keden qyzmetiniń tóraǵasy A. Sýlaimanov, memlekettik salyq qyzmetiniń tóraǵasy O. Abdykaimov, ekonomikalyq qylmystarmen kúres jónindegi memlekettik qyzmet tóraǵasy Z. Osmonov, memlekettik kóshi-qon qyzmetiniń tóraǵasy M. Aidaraliev, memlekettik shekara qyzmeti tóraǵasynyń orynbasary K. Isakov jáne t. b. bar.
Qazaqstan Respýblikasynyń Qyrǵyzstan respýblikasymen saýda ainalymy 2017 jyldyń qańtar-shilde aralyǵynda 399,2 million dollardy quraǵan, sondai-aq, ótken jyldyń osy kezeńimen (311,6 million dollar) salystyrǵanda 28,1 paiyzǵa (87,6 million dollarǵa) ulǵaiǵan.
Qazaqstannyń Qyrǵyzstan respýblikasymen 2017 jyldyń qańtar-shilde aralyǵyndaǵy saýda teńgerimi oń kórsetkishke ie bolyp, 127,6 million dollardy quraǵan. Bul ótken jylmen (101,2 million dollar) salystyrǵanda 26 paiyzǵa ósken.
