Qazaqstannyń premer-ministri Baqytjan Saǵyntaev "Jahandaný dáýirindegi tsifrlyq kún tártibi" atty forýmda memlekettiń qoǵamnyń tsifrlyq qyzmet kórsetýlerge degen suranysyn qanaǵattandyra almai otyrǵanyn málimdedi, dep habarlaidy "Ult aqparat" sputniknews.kz agenttigine silteme jasap.
Úkimet basshysynyń sózine súiensek, 10 jyl buryn Qazaqstannyń elektrondy qyzmet kórsetýlerdi engizýi eleýli tóńkeris bolǵan edi, al qazir jańa umtylystar qajet.
"Qazirgi qoǵam biz usynyp otyrǵan múmkindikterge qanaǵattana ma? Qoǵamnyń qoiǵan talabynan artta qalǵanymyzdy kórip otyrmyz. Sol sebepti jumysymyzdy qaita qarap, aldaǵy ýaqytta memlekettik qyzmet kórsetýlerdi 80 paiyz elektrondy formatqa kóshiremiz dep aldymyzǵa biik maqsat qoidyq", — dedi Qazaqstannyń úkimet basshysy.
Saǵyntaev atap ótkendei, Qazaqstannyń úkimeti, barlyq óńiri men kásipkerler qaýymdastyǵy osymen ekinshi jyl kún tártibine tsifrlandyrý máselesin qoiyp keledi.
Sonymen birge, úkimet basshysy eske sala ketkendei, 2020 jylǵa deiin aýyl halqyn túgeldei internetpen qamtamasyz etý jumysy aiaqtalmaq.
"Tsifrly qoǵamǵa aýysý zamanaýi úrdis bolýy tiis. Qaǵazben jumys isteseń, artta qaldyń degen sóz, kóne tas ǵasyrynda júrgenińmen teń, qazir ony eshkim qoldanbaidy – sánnen shyǵyp qaldy. Búkil qoǵam soǵan qol jetkizse deimiz", — dedi premer-ministr.
