Almaty ákimi Baqytjan Saǵyntaev Qoǵamdyq keńes múshelerimen qaladaǵy epidemiologiialyq jaǵdaidy talqyladyiý
Beinekonferentsiia rejiminde ótken kezdesýde koronavirýs infektsiiasyna qarsy is-qimyl jáne epidemiologiialyq jaǵdaidy turaqtandyrý sharalary boiynsha máseleler pysyqtaldy. Sonymen qatar, karantin kezinde sanitarlyq qaýipsizdikti qamtamasyz etý jáne qala tirshiligi men ekonomikasyn kezeń-kezeńimen qalpyna keltirý jospary Exit Strategy-di iske asyrý máseleleri talqylady.
«Almatyda epidemiiaǵa qarsy is-qimyl jumystary 6 qańtarda úsh kezeń boiynsha bastaldy. Infektsiianyń syrttan kelýin boldyrmaý maqsatynda qalaǵa kiretin barlyq halyqaralyq joldarda sanitarlyq-epidemiologiialyq baqylaýdy kúsheitý; epidemiiaǵa qarsy aýqymdy is-sharalar; infektsiianyń jasyryn rezervýarlaryn anyqtaý jáne jappai testileý júrgizý arqyly epidemiologiialyq jaǵdaidy tolyq baqylaýdy qamtamasyz etý siiaqty sharalar qabyldandy», – dep habarlady qala ákimdiginiń baspasóz qyzmetinen.
Tegin testileýge jatatyn qaýip tobyna: meditsinalyq uiymdardyń, quqyq qorǵaý organdarynyń, kommýnaldyq mekeme qyzmetkerleri, Ulttyq ulannyń áskeri qyzmetshileri, tynys alý joldarynda sozylmaly aýrýlary bar adamdar jáne respiratorlyq belgileri bar naýqastar jatady.
Búginde 122 myńnan astam test júrgizildi. Sonyń ishinde 102 myń adam PTR ádisimen tekserildi. Test 1872 adamda oń nátije kórsetti. Sonyń ishinde 92% profilaktikalyq skriningter kezinde; 1% – syrttan ákelingen jaǵdailar; 7% – jergilikti jaǵdailar.
«100 myń turǵynǵa shaqqanda PTR ádisimen tekserý kórsetkishi 4903 zertteýdi quraidy. Bul, damyǵan eýropalyq elderdiń deńgeiine sáikes keledi. Zerthanalyq qyzmetterdiń barlyq áleýeti iske qosyldy. Zerthanalar sany 2-den 7-ge deiin ósti, mobildi qorshaý pýnkti ashyldy, 8 jyljymaly qabyldaý pýnktin ashý josparlanýda. Jalpy KVI-ge testileý kólemin kúnine 4500-5000 deiin jetkizý josparlanyp otyr», – dep qosty baspasóz qyzmetinen.
Sondai-aq, shahar basshysy Baqytjan Saǵyntaev meditsina qyzmetkerleri men qala turǵyndaryn áleýmettik jaǵynan qoldaý sharalary týraly aitty. Memleket basshysynyń tapsyrmasyna sáikes, meditsina qyzmetkerlerin qoldaýdyń keshendi júiesi quryldy. Meditsinalyq mekemeler jeke qorǵaný quraldarynyń jetkilikti kólemimen jáne dezinfektsiia quraldarymen qamtamasyz etilgen.
Densaýlyq uiymdarynda juqtyrýdyń aldyn alý sharalary qabyldandy. Ol úshin taza jáne las aimaqtardy shekteý úshin arnaiy shliýzder salyndy. Meditsina mamandaryna ýaqytsha baspana berilip, ystyq tamaq pen kólik uiymdastyryldy.
Naýryz aiynda 3769 meditsina qyzmetkerine 1134,8 mln teńge, sáýir aiynda 4391 mamanǵa 1567,5 mln teńge ústemeaqy tólendi. «Nur Otan» partiiasynyń qorynan 970 meditsina qyzmetkeri 48,5 mln teńge aldy.
Jiyn barysynda ekonomikany jáne kásiporyndardyń qyzmetin qalpyna keltirý, jumys oryndaryn qurý, ShOB-ty qoldaý, áleýmettik máselelerdi sheshý men bilim berý nysandaryn salý, sondai-aq qala ekologiiasyn saýyqtyrý máseleleri kóterildi.
Onlain-rejimde ótken kezdesý 2,5 saǵatqa sozyldy. Qoǵamdyq keńes músheleri óz eskertýleri men usynystaryn aityp, jalpyqalalyq máselelerdi sheshýde belsendi atsalysýǵa daiyn ekendikterin jetkizdi.
