QR premer-ministri Baqytjan Saǵyntaev meditsinalyq kómek sapasyn áli de bolsa kóterý qajettigin aitty, dep habarlaidy "Ult aqparat".
Búgin Úkimet otyrysynda QR Premer-Ministri Baqytjan Saǵyntaev Densaýlyq saqtaý ministrligine meditsinalyq kómektiń sapasyn arttyrý boiynsha qabyldanǵan sharalardyń tiimdi oryndalýyn qamtamasyz etý úshin óńirlermen birlese otyryp jumys jasaýǵa tapsyrma berdi.
Baiandamalardy qaraý qorytyndysy boiynsha, Densaýlyq saqtaý ministrliginiń bolashaqta atqarylýy tiis jumystarynyń tásilderi bekitildi. Sóz arasynda Premer-Ministr búginde qyrýar jumystar jasalyp jatqanyna qaramastan meditsina salasynda áli de kemshin tustardyń bar ekeni atap ótti. Ásirese aýyldy jerlerdiń halqy sapaly meditsinalyq qyzmetke jetkilikti túrde qol jetkize almai otyr. Osyǵan orai, Densaýlyq saqtaý ministrligine óńirlermen birlesip usynylǵan sharalardy tiimdi iske asyrý tapsyryldy.
"Bizde densaýlyq saqtaý jelisi damyǵan, ony jaqsy bilesizder. Degenmen halyq áli de bolsa, sapaly meditsinalyq kómek ala almai keledi, ásirese aýyldyq jerlerde. Sondyqtan búgin ministr usynǵan meditsinalyq kómek sapasyn jaqsartý boiynsha sharalardy qoldaiyq", — dedi Saǵyntaev úkimet otyrysynda.
Astana qalasynda ákimdiktiń bastamasymen «Úidegi dáriger» jobasy iske asyrylyp jatyr. Jobaǵa sáikes qaladaǵy turǵyn úi keshenderiniń birinshi qabattarynan shaǵyn AMSK ortalyqtaryn ashylý kózdelip otyr. Búginde qalada osyndai úsh ortalyq óz jumysyn bastady. Sonymen qatar, 2016 jyldan beri №8 qalalyq emhananyń bazasynda alǵashqy meditsinalyq kómek dárigerleriniń praktikasyn qurý jobasy iske asyrylǵan bolatyn, onda dárigerler toptyq praktikanyń quryltaishylary bolyp aiqyndaldy. Jobany iske asyrý nátijesinde konsýltatsiialyq-diagnostikalyq qyzmetterdi tutyný 33%-ǵa tómendedi, dárigerler men meiirgerlerdiń jalaqysy 2 esege ulǵaidy, meditsinalyq qyzmet sapasynyń indikatorlary 1,5 esege jaqsardy.
Sondai-aq, Baqytjan Saǵyntaev jeke investorlardy tartý arqyly meditsina mekemeleriniń sapasyn jaqsartý salasyndaǵy Astananyń oń tájiribesine nazar aýdaryp, ony basqa oblystardyń da qolǵa alýyn tapsyrdy.
«Dárigerdiń aldyndaǵy uzyn-sonar kezekti múlde azaitý kerek. Keshe ǵana Soltústik Qazaqstan oblysynda bolyp keldik. Jańadan shaǵyn aýdan boi kóterip jatyr. Buryn ol jerde 600 úi bolsa búginde onyń barlyǵy súrilip, ornyna 2000 páter salynyp otyr. Eger buǵan deiin ol jerdegi emdeý mekemesine 600 otbasy tirkelgen bolsa, búginde olardyń sany 2000-ǵa jetip otyr. Júkteme kóbeiip keledi», — dep QR Premer-Ministri, úilerdiń jobalaryn ázirleý kezinde birinshi qabattarda halyqqa arnap emhanalar men balabaqshalardy ornalastyrý máselesine nazar aýdarýdy tapsyrdy. Ári bul jumystar barlyq óńirlerde iske asyrylýy tiis ekenin eskertti.
Baqytjan Saǵyntaev ótken jyly Memleket basshysy Qazaqstan halqyna Joldaýynda densaýlyq saqtaý salasyn qaita retteý máselesine basa nazar aýdarýdy tapsyrǵanyn eske saldy. Ásirese shaǵyn meditsina uiymdaryn qurý jáne salaǵa investitsiialar tartý múmkindigi erekshe atalyp ótken edi.
Budan ózge, Densaýlyq saqtaý ministrligine Aqparat jáne kommýnikatsiialar ministrligimen jáne ákimdiktermen birlesip, meditsina salasynda júrgizilip jatqan reformalar, adamdardyń sapaly meditsinalyq kómek alýyn jeńildetý úshin engizilip jatqan zamanaýi tsifrlyq tehnologiialar týraly halyqqa túsindirý jumystaryn turaqty negizde júrgizip otyrý tapsyryldy.
