Búgin Almaty ákimi Baqytjan Saǵyntaev indýstriialyq aimaqtaǵy jobalardyń júzege asyrylý barysymen tanysty, dep habarlaidy "Ult aqparat".
Karantin sharalarynyń báseńdeýine bailanysty kásiporyndar burynǵy jumys rejimine oralýda.
«Byltyr Indýstrialdy aimaqtyń jumys isteý printsipin qaita qarastyrdyq. Qalaǵa ekonomikanyń naqty sektoryn qaitaryp, damytý qajet. Búginde 12 joba júzege asyryldy. Taǵy 46 joba iske asyrylý satysynda tur. Sonyń 10-yn - biyl, al 23-in - kelesi jyly iske qosýdy josparlap otyrmyz. Barlyq 58 jobanyń investitsiiasynyń jalpy somasy - 248 mlrd teńge bolyp otyr. Tamaq pen meditsina ónerkásibi, logistika, qurylys jáne avtomobil jasaý salasyndaǵy joǵary bilikti mamandar úshin 8,5 myń jumys orny qurylady»,- dedi ákim.
Sondai jobalardyń biri - energetikalyq tiimdi sáýlettik qasbetter zaýyty salynyp jatyr. Kásiporyn joǵary sapaly energiia únemdeitin PVH jáne aliýminii profildik qurylymdardy shyǵarýdy jolǵa qoiyp otyr. Onyń qýaty — jylyna 475 myń sharshy metr. Al jobanyń quny — 3,8 mlrd teńge. 80 jumys orny ashylady.
Birinshi kezeńi ótken jyldyń sońynda bastalǵan Hyundai Trans Kazakhstan avtoqurastyrý zaýytynda jylyna 45 myń avtokólik shyǵarylady. Jumys kólemniń 75%-yn - Qazaqstanda, 25%-yn - taiaý shet elderde iske asyrý josparlanǵan. Ekinshi kezeńdi iske qosý kúzge josparlanǵan. Boiaý, dánekerleý jáne basqa da óndiristik avtomattandyrylǵan jeliler ashylady. Bul rette kásiporyn oqshaýlaý úlesin 5 jyl ishinde bir model úshin birtindep 50%-ǵa deiin ósire otyryp jetkizedi. Jobanyń jalpy quny - 25 mlrd teńge. Munda 700 jumys orny ashylady.
Qala ákimi atap ótkendei, Almatyny indýstriialandyrý úshin joǵary tehnologiialyq óndirister qurý qajet, onda bilikti mamandar úshin joǵary aqy tólenetin jumys oryndary ashylady.
«Mundai jobalar Almatynyń álemdegi damyǵan qalalardyń arasynda básekege qabiletti bolýyna múmkindik beredi. Oǵan qosa jańa ekonomikalyq modeliniń negizine ainalady. Ekonomikanyń qurylymdyq manevriniń basty maqsaty da osy. Eksporttyq óndiristerdi damytý jáne álemdik joǵary tehnologiialar ekonomikasyndaǵy bizdiń óndirýshilerdiń úlesin keńeitý qala ekonomikasyn ártaraptandyrýǵa múmkindik beredi», — dedi Baqytjan Saǵyntaev.
Indýstriialyq aimaqta azyq-túlik qaýipsizdigin qamtamasyz etý sharalary sheńberinde jylyjai kesheniniń jobasy iske asyryldy. Qýaty 7,2 myń tonna bolatyn kókónis óndirisi jolǵa qoiyldy. Joba quny - 7,8 mlrd teńge. 185 jumys orny ashylǵan. Óndiriste tyńaitqyshtar men mineraldardy avtomatty túrde beretin tamshylatyp sýarý júiesi qoldanylady.
Sondai-aq, tamaq ónerkásibi klasterinde tolyq óndiristik tsiklmen et óńdeitin zaýyt ashyldy. Qýaty 3,5 myń tonna bolatyn kásiporynda 100 túrli shujyq ónimderi shyǵarylady. 250 jumys orny ashyldy.
Jumys sapary barysynda qala ákimi sondai-aq «Kelet» AQ sýmen jabdyqtaý, jylytý jáne jeldetý, sonyń ishinde gaz qazandary men sý sorǵylaryn óndiretin zaýytqa bardy. Jumys oryndarynyń sany — 230, karantin kezinde 190 adam jumys istep jatyr.
