Búgin Úkimet úiinde Qazaqstan Respýblikasynyń Premer-Ministri Baqytjan Saǵyntaev Palata prezidenti, «KATKO» JShS bas direktory Jerar Fries bastaǵan «Frantsiia–Qazaqstan» saýda-ónerkásiptik palatasynyń ókilderimen kezdesý ótkizdi, dep habarlaidy "Ult aqparat".
Kezdesý barysynda investitsiialar, aýyl sharýashylyǵy, energetika jáne tsifrlandyrý salalaryndaǵy ekijaqty yntymaqtastyq máseleleri talqylandy. Budan ózge, Qazaqstan–Frantsiia qarym-qatynasyn odan ári keńeitýge qatysty birlesken jumystardyń jospary qaraldy.
Aita keteiik, Qazaqstan men Frantsiia arasyndaǵy taýar ainalymy 2018 jylǵy qańtar–qarasha aralyǵynda $4 mlrd qurady, bul ótken jyldyń sáikes kezeńindegi kórsetkishten ($3,1 mlrd) 27,3%-ǵa joǵary. Qazaqstannan Frantsiiaǵa eksport 2018 jylǵy qańtar–qarasha ailarynda 27,7% ósip, $3,4 mlrd qurady.
