Búgin Úkimet otyrysynda QR Premer-Ministri Baqytjan Saǵyntaev baspanaǵa kezekte turǵandar leginiń sońǵy 3 jylda 2,5 ese artýyna alańdaýshylyq tanytty. Bul týraly QazAqparat jazdy.
«Qýandyq Ýálihanuly (QR Ulttyq ekonomik ministri) mende bir saýal bar. Statistikaǵa qarasaq, sońǵy 2-3 jylda kezekke turýshylardyń sany kúrt ósip ketipti. Máselen, 2013 jyldan bastap alsaq, 3 jyldyń ishinde bizdegi ósim 2,5 ese bolyp otyr. Bul máselede qandai da bir túgendeý júrgizile me álde bárin tirkei beremiz be? Bir adam birneshe qalada kezekte turýy múmkin ǵoi», - dep surady Úkimet basshysy ministrden.
«Bizde kezekke qoiý tetikteri «Turǵyn úi qatynastary týraly» zańda qarastyrylǵan. Shynymen de kezekke tura alatyn azamattar sanaty bizde óte kóp. Azamattardyń alatyn tabystarynyń deńgeiine qarai bólý joq. Zańǵa belgili bir jańǵyrtý júrgizý talap etiledi. Buǵan qosa, ósimniń artýyna sońǵy ýaqytta memlekettiń turǵyn úi qurylysyna basa nazar aýdarýy da túrtki bolyp otyr», - dedi ol.
Ministr búginde elimizde jalǵa beriletin jáne satylatyn úilerdiń kóptep salynyp jatqandyǵyn atap ótti.
«Soǵan sáikes, ózińiz de Turǵynúijinaqbanki salymshylarynyń statistikasynan kórip otyrǵanyńyzdai, 2 jylda 34 paiyzǵa ósim bar. Dál osyndai jait kezekke de bailanysty týyndaýda. Qazir «Nurly jer» baǵdarlamasy aiasynda bul máselelerdiń barlyǵyn sheshemiz. Buǵan qosa, shyn máninde áleýmettik baspanaǵa muqtaj azamattar oǵan úmitker bola alatyndai zańnamaǵa bastamalar da kóteremiz», - dedi Q.Bishimbaev.
