Almaty qalasynyń ákimi Baqytjan Saǵyntaev 70-ten astam meditsinalyq uiymdardyń bas dárigerlerimen koronavirýs indetine qarsy júieli sanitarlyq-epidemiologiialyq jumysty qurý jóninde onlain jiyn ótkizdi, dep habarlaidy "Ult aqparat".
«Barlyq kúsh koronavirýstyq infektsiiamen kúreske jumyldyrylǵan. Birinshi basymdyq – halyqty qorǵaý. Ol úshin qaladaǵy barlyq sala tartyldy. Eń aldymen bizdiń dárigerler, emhanalar men uiymdar tarapynan qajetti talaptar oryndalyp jatyr. Basty másele – búkil qala boiynsha koronavirýstyq infektsiianyń taralýyna jol bermeý», - dedi Baqytjan Saǵyntaev.
Sonymen qatar, ol bas dárigerlerdi ashyq dialogqa shaqyryp, ózekti máselelerdi talqylaýdy jáne olardy jedel sheshý úshin qajetti sharalardy birlesip atqarý kerektigin aitty.
Onlain jiyn barysynda jeke qorǵanys quraldarymen qamtamasyz etý, infektsiialyq statsionarlarda dárigerlerdiń jáne barlyq sanattaǵy meditsinalyq qyzmetkerlerdiń qaýipsizdigi úshin qajetti sanitarlyq-epidemiologiialyq normalardy saqtaý, meditsinalyq qyzmetkerlerge ústemeaqy tóleý, turǵyn úi jaǵdailary jáne naýqastarmen jumys isteitin barlyq meditsinalyq qyzmetkerlerdi tamaqtandyrý, sonymen qatar turǵyndardyń COVID-19 testine tapsyrý máseleleri qarastyryldy.
Atqarylǵan jumystar jaily qalalyq Qoǵamdyq densaýlyq basqarmasynyń basshysy T.Ábildaev jáne Taýarlar men qyzmetterdiń sapasy men qaýipsizdigin baqylaý departamentiniń basshysy A.Moldaǵasymova baiandady. Óz kezeginde meditsinalyq qoǵamdastyq ókilderiniń atynan №1 qalalyq klinikalyq aýrýhananyń bas dárigeri E. Qaliev sóz sóiledi.
Búgingi tańda Almaty qalasynda 21 370 adam COVID-19-ǵa tekserýden ótti. Zerthanalyq túrde rastalǵan koronavirýstyq infektsiia juqtyrǵan 350 jaǵdai tirkeldi. Juqpaly aýrýhanalarda 299 naýqas em alyp jatsa, provizorlyq ortalyqtarda 256 adam, karantindik oqshaýlaýda — 366, úi karantininde — 7097 adam bar. Meditsinalyq uiymdar barlyq jeke qorǵanys quraldarymen, onyń ishinde 4500-den astam birneshe ret paidalanýǵa jaramdy qorǵanys meditsinalyq kostiýmderimen qamtamasyz etilgen.
QR Prezidentiniń tapsyrmasy boiynsha, Almaty qalasynda koronavirýspen kúreske jumyldyrylǵan densaýlyq saqtaý uiymdary qyzmetkerleriniń ústemeaqysynyń 99% tólendi. Qalǵan eki karantindik uiym mamandarynyń ústemeaqysyn tóleý boiynsha jumystar júrgizilýde.
Tótenshe jaǵdai kezinde meditsina qyzmetkerleri ózderiniń talap-tilekterine sáikes qonaqúilerge, hostelder men jataqhanalarǵa, sondai-aq týysqandarynyń úilerine ornalastyryldy. Sonymen qatar qonaqúilerde turýǵa niet bildirýshiler úshin de qosymsha jatyn oryndar bar. Bul rette turý jáne tamaqtanýǵa arnalǵan shyǵyndar jergilikti biýdjet qarajaty esebinen jabylatyn bolady.
Budan ózge jiyn barysynda tótenshe jaǵdaidyń 1 mamyrǵa deiin uzartylǵany jáne 20 sáýirden bastap ónerkásip jáne qurylys kásiporyndary, qyzmet kórsetý salasynyń belgili bir sektorlarynyń jumysyn iske qosýdy eskere otyryp, koronavirýstyq infektsiiany taratpaý boiynsha sanitarlyq-epidemiologiialyq normalardyń odan ári saqtalýyn qamtamasyz etý jónindegi sharalar qaraldy.
Sondai-aq jańa modýldik juqpaly aýrýlar aýrýhanasynyń jumysyn jolǵa qoiý máselesi sóz boldy. Iaǵni, aýrýhanaǵa meditsinalyq qyzmetkerlerdi tartý jáne onyń tehnikalyq quraldarmen jabdyqtalýyna erekshe kóńil bólý.
Megapolis ákimi kezdesýdi qorytyndylai kele, COVID-19 indetimen kúres jolynda júrgen barlyq mamandarǵa tártip pen sanitarlyq-epidemiologiialyq normalardy qatań saqtaý kerektigin atap ótti.
«Baýyrjan Momyshulynyń sózi bar «Tártipsiz el bolmaidy, tártipke bas igen qul bolmaidy». Bir jaǵadan bas, bir jeńnen qol shyǵara otyryp, jumyla jumys isteý qajet. Ásirese, dál búgingidei syn shaqta árbir jumys ornynda qatań tártip kerek», - dedi Baqytjan Saǵyntaev.
Sondai-aq, ol ákimdik, quqyq qorǵaý qyzmeti, áskeri qyzmetshiler de qalanyń epidemiologiialyq qaýipsizdigin qamtamasyz etý maqsatynda jan-jaqty qoldaý kórsetetinin tilge tiek etti.
