QR Premer-ministri Baqytjan Saǵyntaev búgingi Úkimet otyrysyn kúni keshe ǵana elordada jaýǵan nóser jaýyn saldaryna toqtalýdan bastady, dep habarlaidy Baq.kz tilshisi.
«Kún tártibin bastamas buryn bir máselege nazar aýdarǵymyz kelip otyr. Ol – Astana qalasynda sońǵy kúnederi bolǵan nóser jaýynnyń saldary týraly. Ózderińiz bilesizder, sońǵy 1-2 kúnde tolassyz jaýǵan jaýynnyń kesirinen Astanadaǵy birqatar kósheler kólkigen sýdyń astynda qaldy. Sonyń saldarynan jaiaý júrginshiler men avtokólik ieleri zardap shekti, qoǵamdyq kólik qozǵalysy da qiyndap ketti. Bul másele jóninde Elbasy tarapynan birneshe oryndy syn-eskertýler aitylǵan bolatyn. Qaladaǵy káriz júiesin retteý boiynsha tiisti tapsyrmalar da berilgen bolatyn. Kommýnaldyq qyzmetterdiń nashar jumystarynan qala turǵyndary zardap shekpeýi kerek. Bizde Baýyrjan Momyshuly, Turan dańǵyldary jáne Uly Dala kóshesiniń qiylysy, Baraev jáne Jastar shaǵyn aýdandarynyń jaýyn sýynyń astynda qalýy sońǵy kezde qalypty jaǵdaiǵa ainalyp bara jatqan siiaqty. Áset Órentaiuly, ákimdik mundai jaǵdaidyń aldyn alý boiynsha qandai is-sharalar qabyldap jatyr? Aýa raiyn boljaý qyzmetteriniń habarlaýy boiynsha jaýyn áli de jalǵasatyn túri bar», - dep Astana qalasynyń ákimi Áset Isekeshevten qysqasha esep berýdi surady.
Qala ákimi osy jyldar ishinde elordany nóser jaýynnan qorǵaý baǵytynda jasalǵan birqatar jumystarǵa toqtalyp ótti.
«Sý kárizderiniń júiesi qala damýyndaǵy júieli basym baǵyttardyń biri. 2016 jylǵy Elbasy bergen tapsyrmadan keiin 3 jylǵa arnalǵan baǵdarlama daiyndaldy. Qazir biz baǵdarlama boiynsha kezeń-kezeńimen berilgen qarajat aiasynda júzege asyryp kelemiz. Ony 2019 jyly tolyq aiaqtaimyz. Osy jyldar ishinde sý kárizderi júiesinde aýqymdy jumystar júrgizildi. Ótken jyly biz Turan, Uly Dala, 31, Seifýllin kóshelerinde, Kóktaý kentinde, Myńjyldyq alleiasynda tazalaý qurylǵylarynyń qurylysyn aiaqtadyq», - dedi Isekeshev.
Ol jańbyr jaýǵan saiyn sý astynda qalatyn Aqbulaq aýdany men Momyshuly kóshesine jaqyn mańdaǵy kósheler men jaǵadan salynyp jatqan aýdandardaǵy jańbyr sýy jinalatynyn atap ótti. Bul problema 2019 jylǵa deiin sheshimin tabatynyn aitty.
«Keshegi jaǵdaiǵa toqtalatyn bolsaq, Qazgidromettiń málimeti boiynsha 1,5 táýlik ishinde 45 mm jaýyn-shashyn jaýǵan. Ailyq norma 29 mm. Sonda, bul ailyq normadan shamamen 1,5 esege artyq bolyp otyr. Áreket etýshi qurylys normalary men erejelerine sáikes, nóser jaýyn jelileri 20 minýttyq úzilissiz jaýynǵa eseptelgen. Odan keiin 4 saǵat ishindi sý ketýi kerek. Bizde 21 tamyzda sý astynda qalý jaǵdaiy oryn alǵan joq. 20 tamyzda, rasymen de, birmezgildik jańbar jaýdy. Normativterge sáikes, jaýyn sýy soryldy. Barlyq kommýnaldyq qyzmetter eki táýlik boiy jumys istegenin atap ótkim keledi», - dedi qala basshysy.
Áset Isekeshev 20 minýttyq birmezgildik jaýynǵa arnalǵan nóser jaýyn jelilerin qarastyratyn QNjE jaǵdaiynda qalyptan tys jańbyr jaýsa, mundai oqiǵalar áli de oryn alatynyn atap ótti. Onyń aitýynsha, biylǵy jyly Singapýr, Máskeý, Kiev pen AQSh, Germaniia, Frantsiianyń birqatar qalalary da jaýyn sýynyń astynda qalǵan.
«Qazir áreket etýshi tabiǵi monopoliialar týraly zańda zańnamalyq turǵyda nóser jaýyn naýalaryndaǵy qaldyq sýlardy tógý qyzmetteri rettelmegen. Sondyqtan, biz «Astana Tazalyq» bazasynda nóser jaýyn kárizderin burý jóninde kásporyn qurýdy suraimyz. Ol mekeme osy baǵyttaǵy barlyq qyzmetterdi qamtyp, óz baqylaýynda ustaityn bolady», - degen ol «Astana Tazalyq» mekemesin jekeshelendirý tiziminen alyp tastaýdy surady.
Úkimet basshysy osy máselege jaýapty tulǵalarǵa sáikes tapsyrma berip, qala basshysynyń usynysyna qoldaý bildirdi.
«Degenmen de, Astana qalasy ákimdiginiń tez arada osyndai jaǵdaidyń aldyn alý úshin qajetti sharalardy qabyldaýdy, kommýnaldyq qyzmetterdiń jumysyn kúsheitýdi tapsyramyn. Aityp otyrǵan usynystar men pikirlerińizdiń barlyǵy durys. Biraq, jańa men aityp ótkendei, másele Astana kósheleriniń barlyǵynda emes, birqatar kóshelerinde jyldan-jylǵa qalyptasqan jaǵdai. Basqa kóshelerdiń barlyǵy týra sondai bolyp sý astynda qalyp jatqan joq. Baýyrjan Momyshuly dańǵylynda avtobýs sý astynda qalyp jatyr, avtobýstyń ishine sý kirip ketken. Sol sebepti, sondai kúrdeli kóshelerde aldyn ala jumystar atqaryp, tazalap qoiý qajet. Jurtshylyqtyń da, qala turǵyndarynyń aityp otyrǵany osynda. Kárizderdi, sý jinaityn qudyqtardy da der kezinde tazalaý máselelerin erekshe baqylaýǵa alyp, jaýyn jaýǵan saiyn sýastynda qalatyn aýmaqtardy endi mundai jaǵdai boldyrmas úshin is-sharalar daiyndaý kerek. Ótken aptada Astana qalasynyń 5 jyldyq josparyn usyndyńyz, ony Elbasyna da baiandadyńyz. Biraq, sonyń ishinde, jaýyn-shashynnan keiin bolatyn jaǵdaiǵa, kárizderge de basa nazar aýdarý kerek. Asqar Uzaqbaiuly, Úkimetke shyǵarǵanǵa deiin bul keshendi jospardy taǵy bir qarap shyǵyńyz. Aldaǵy ýaqytta mundai jaǵdaidy qalai sheshemiz? Birinshi kezekti osy turýy kerek. 20 jyl boiy bul máselege atústi qarap keldik dese de bolady. Jaýyn jaýady, sý astynda qalamyz, sý ketken soń, bárin umytyp ketemiz», - dedi Premer-ministr.
