Armeniia premer-ministriniń mindetin atqarýshy Karen Karapetian Qazaqstan premer-ministri Baqytjan Saǵyntaevpen telefonmen sóilesip, ekijaqty qarym-qatynas jáne Eýraziia ekonomikalyq odaǵy (EAEO) aiasyndaǵy yntymaqtastyq máselelerin talqylady, - dep habarlady Armeniia úkimetiniń baspasóz qyzmeti. Armeniia úkimetiniń habarlaýynsha, 24 sáýir kúngi telefonmen sóilesýdi Qazaqstan jaǵy usynǵan.
Eki jaqty áńgimede sonymen qatar Armeniiadaǵy oqiǵalar da talqylanǵan. "Baqytjan Saǵyntaev yntymaqtas armian halqyna qoldaý bildirdi" dep habarlaidy Armeniia úkimetiniń baspasóz qyzmeti.
Qazaqstan premer-ministriniń resmi saity Baqytjan Saǵyntaevtyń Karen Karapetianmen sóileskeni týraly ázirge habarlamady.
24 sáýirde Karen Karapetian Belarýs premer-ministri Andrei Kobiakovpen de telefonmen sóilesken.
Karapetian men Kobiakov Armeniia-Belarýs qarym-qatynasyn ekijaqty jáne kópjaqty formatta damytý keleshegin talqylaǵan. Olar Armeniiadaǵy jaǵdaidy da talqylap, Kobiakov armian halqyn qoldaitynyn bildirgen.
23 sáýirde Armeniia premer-ministri Serj Sargsian otstavkaǵa ketken. Ol oppozitsiia 11 kún ózine qarsy sherý ótkizgen soń osyndai sheshim qabyldaǵan. Armeniia úkimeti Sargsian otstavkaǵa ketken soń premer-ministr mindetin onyń orynbasary Karen Karapetian atqaratynyn jariialaǵan. Sargsianniń odaqtasy Karapetian 2016 jyldyń 13 qyrkúieginen 2018 jyldyń 9 sáýirine deiin Armeniia premer-ministri qyzmetin atqarǵan.
Máskeý bastaǵan EAEO-ǵa Reseiden ózge Armeniia, Belarýs, Qazaqstan jáne Qyrǵyzstan múshe.
