Almaty ákimi Baqytjan Saǵyntaev halyqqa esep berý kezdesýinde «Altyn Orda» bazary mańyndaǵy kólik jolairyǵy týraly aitty, dep habarlaidy «Ult aqparat».
Halyqqa esep berý kezdesýinde turǵyndar ákimnen qalanyń shyǵa berisindegi «Altyn Orda» bazarynda salynyp jatqan jol aiyryqtyń qurylysy qashan aiaqtalatynyn surady.
«Men oblysta turamyn, qalada jumys isteimin. Kúnine eki saǵat qalaǵa qarai júrem, keri qaitarda taǵy eki saǵatta qatynaimyn. Kúnine ómirimniń tórt saǵaty jol ústinde ótip jatyr. Ol jerde meniń densaýlyǵym da, júikem de qalyp jatyr. Qarapaiym halyq kólik keptelisinen aryla almaidy. Siz áleýmettik jelilerdi baqylap, osy problemalardy kórip otyratyn shyǵarsyz? Sondyqtan osy máseleni sheshýińizdi ótinemin. Biz budan sharshadyq», - dedi turǵyn.
Saǵyntaev bul jol aiyryq qurylysynyń tezirek bitýine nietti ekenin jetkizdi.
«Altyn Orda» bazarynyń ainalma joly barlyǵymyzdy sharshatty. Qalaǵa kelgeli Altyn Ordanyń joly qashan sheshiledi degen máseleni estip kele jatyrmyn. Ókinishke qarai, Altyn Orda bazary qalaǵa jatpaidy. Ol Almaty oblysynyń jeri. Men de sol joldyń sheshilýin kútip júrmin. Onyń jumysy ministrliktiń quzyretinde. Ministrlik merdiger kompaniiany tańdaǵan, aqshasy jetkilikti. Biraq merdigerdiń kúshi jetpei me, basqasy ma, bergen aqshany igermei áli kele jatyr. Ótkende Premer-ministr myrza kelgende osy máseleni taǵy kóterdik. Almatylyqtar úshin qalaǵa kirip-shyǵý qiynǵa soǵyp otyr. Eger bul jol bitse, bir máseleni sheshtik dep esepteimiz», - dedi Saǵyntaev.
Aita keteiik, «Altyn orda» mańynda kólik jolairyǵynyń qurylysy 2017 jyly bastalǵan bolatyn.
