Túrksib aýdanynyń turǵyndarymen kezdesken Almaty ákimi Baqytjan Saǵyntaev eski úilerdi súrý, mektepterdegi oryn tapshylyǵy, qoǵamdyq kólik qatynasy týraly aitty, dep habarlaidy "Ult aqparat".
Bul kezdesý «ashyq mikrofon» qaǵidatymen ótti.
Qalada 3 myńǵa jýyq eski úi bar bolsa, olardyń jartysy Túrksib aýdanynda ornalasqan. «Eski baspana» baǵdarlamasy aiasynda apattyq úilerdi súrý úshin jekemenshik investorlar tartylýda.
«Osy baǵyttaǵy jumys jalǵasyp jatyr. Alaida, barlyq turǵyndar birdei ótemaqy kólemimen kelise bermeidi. Sol úshin súrý protsesi tym uzaqqa sozylyp ketedi», - dedi Saǵyntaev.
Almaty basshysy uzaq jyldar boiy turǵan aýdandaǵy 12 myń aǵashty otaý kerektigin aitty.
Turǵyndardyń biri «Nurshashqan» shaǵynaýdanyndaǵy emhananyń qurylysy nelikten aiaqtalmai jatqanyn surady. Óz kezeginde Baqytjan Saǵyntaev qujattardy qysqa merzimde rásimdep, quzyrly organdarǵa kelesi jyly áleýmettik nysandy paidalanýǵa berýdi tapsyrdy.
Sonymen qatar ol adam aǵyny kóp jaiaý júrginshiler joldaryna baǵdarsham ornatýdy buiyrdy.
«Turǵyndardyń aǵymdaǵy máselelerin tez sheship, júieli máselelerge kóshý kerek», - dedi ákim.
Aita ketý kerek, jaqynda B.Saǵyntaev Almatynyń 2020 jylǵa deiingi damý strategiiasyn kópshilik talqylaýyna shyǵarǵan bolatyn. Bul qujatta Almatyny álemniń úzdik 100 qalasynyń qataryna engizý basty maqsat retinde kórsetilgen.
«Osy ambitsiozdy maqsatqa jetý úshin jaqyn jyldary jol jáne kommýnaldyq infraqurylym máselelerin sheshý qolǵa alynǵan. Qalanyń kez kelgen aýdanynda jol, sýmen qamtý, barlyǵy teńdei dárejede bolýy tiis. Sol úshin biz bir-birimizdiń pikirimizge qulaq asyp, jumys istegen durys», - dedi ákim.
Turǵyndardyń kópshiligi Túrksib aýdanyndaǵy qoǵamdyq kólik qatynasyna qatysty shaǵym aitty.
«Qoǵamdyq tasymaldaýǵa keler bolsaq, aldaǵy ýaqytta ozyq elderdiń tájiribesine súienetin bolamyz. Halyqtyń suranysy qai jerde kóp, sol jerge qosymsha kólik, marshrýt bólinedi», - dedi B. Saǵyntaev.
Al turǵyndardyń mektep tapshylyǵy týraly saýalyna memlekettik-jekeshelik áriptestik aiasynda 13 myń oryndyq bilim mekemesin salýǵa baǵdarlama jasalyp jatqany aityldy. Jalpy qalada 30 myń oqýshy orny tapshy.
