Almaty ákimi Baqytjan Saǵyntaev koronavirýs infektsiiasynyń taralý dinamikasy týraly aityp, pandemiiany toqtatýdyń jalǵyz ári senimdi tásili - vaktsina ekenin eske saldy, dep habarlaidy QazAqparat.
«Almaty» telearnasyndaǵy Akimat LIVE baǵdarlamasynyń tikelei efirinde qala ákimi koronavirýs boiynsha epidemiologiialyq ahýaldyń áli de kúrdeli ekenin aitty.
Ótken táýlikte COVID-19-dyń 312 jaǵdaiy tirkeldi, onyń 303-i - simptomdy.
Epidemiia bastalǵannan beri 175 434 adam virýs juqtyrdy. Al jyl basynan beri – 156 913 jaǵdai anyqtaldy.
KVI dertin juqtyrý bazalyq boljam boiynsha turaqtanyp ári tómendep jatyr.
Derttiń tómendeý qarqyny saqtalsa, onda aidyń sońynda juqtyrý deńgeii táýligine 300-den kem bolady degen boljam bar.
Ótken aptada, aldyńǵymen salystyrǵanda, úi oshaqtarynda infektsiia 4%-ǵa, sondai-aq jumys ornynda 0,9%-ǵa, týystarmen, kórshilerimen jáne tanystarymen bailanys kezinde 0,6%-ǵa aitarlyqtai ósti.
Sondai-aq, qoǵamdyq kólikte – 4,8%-ǵa, saýda obektilerinde – 1,5%-ǵa juqtyrýdyń kúrt ósýi baiqalady.
Negizgi juqtyrý oryndary saýda obektileri – 35%, qoǵamdyq kólik – 24%, otbasylardaǵy bailanystar – 20% jáne bazarlarda – 10%.
Infektsiialyq statsionarlarda 1 255 adam jatyr. Onyń 31-i bala.
Keshe birinshi komponentpen 1 581 adam, ekinshi komponentpen 2 691 adam vaktsinalandy. Biylǵy jyldyń 1 aqpanynan 19 qazanǵa deiingi barlyq kezeńde I komponentpen 981 759 adam, II komponentpen 906 264 adam vaktsinalandy.
Baqytjan Saǵyntaev shetelderdegi, sonyń ishinde derttiń kezekti ósýi tirkelgen Reseidegi jaǵdaiǵa nazar aýdardy.
Sondyqtan Almaty ákimi turǵyndardy KVI pandemiiasynyń órshýine jol bermeýge, vaktsina saldyrýdy keiinge qaldyrmaýǵa shaqyrdy.
Vaktsinalanǵan ár adam ahýaldy turaqtandyrýǵa jáne shekteýlerdi joiýǵa aitarlyqtai úles qosatyn bolady.
