Almaty ákimi Baqytjan Saǵyntaev qaladaǵy qoǵamdyq kólikpen bailanysty qalyptasqan máseleler týraly aitty. Bul týraly ákim óziniń Facebook-tegi paraqshasynda bólisti, dep habarlaidy "Ult aqparat".
Búgin ákimdikte qoǵamdyq kólik salasynyń jumysyn jete qaradyq. Naqtyly jumystar júrýde. Jyljymaly sostavtyń avtobýs parki jańarýda. Jolairyqtaryn salý jalǵasýda. Degenmen, sheshimin kútken máseleler bar.
Birinshiden, avtobýs parkteri úshin bilikti kadrlar — júrgizýshiler, servisti mamandar, iaǵni slesarlar men mehanikter jáne basqalary jetispeidi. Olardy daiarlaýdyń júiesi joq. Qalalyq mobildilik (Telibaevqa) jáne bilim (Qojabergenova) basqarmalaryna bilikti kadrlar daiyndaýdyń naqtyly sharalaryn jasaýdy tapsyrdym. Bul jumysty kadrlar qajettiligine boljam jasap ýaqytyly ári kolledjderdiń oqý josparyna sai júrgizgen jón. Apta ishinde Telibaev bul protsessti uiymdastyrýdyń naqtyly mehanizmin usynýy tiis.
Ekinshiden, ekologiialyq taza kólik — Almatynyń trolleibýs jelisi durys baǵalanbai keledi. Bulardaǵy bailanys jelileri tozǵan, kún saiyn úzilip jatady. Ákimdikke qalanyń barlyq trolleibýs jelisin jóndeýdi tapsyrdym. Biylǵy jyldyń ózinde Timiriazev kóshesi boiyndaǵy barlyq 5,1 km jeli aýystyrylady. Qajetti qarjyny bólemiz. Jańa trolleibýstardy satyp alý jumystaryn qatar júrgizip, keler jyly jańa baǵyttardy ashamyz. Qazirgi kezde transformatorlary qosalqy stantsiialardyń qýattary álsiz, sondyqtan olardy da jańartýdy qolǵa alamyz. Bir sózben aitqanda, Almatynyń trolleibýs jelisi - elimizdegi eń iri kólik tarmaǵy.
Úshinshiden, qala syrtyna tasymaldaý máselesi pisip jetilgen siiaqty. Kún saiyn 61 baǵyt boiynsha 600 avtobýs qatynaidy. Qyzmet kórsetý sapasy tómen. Avtobýstardyń basym bóligi tozǵan. Sondyqtan bul máseleni de retke keltirgen jón. Eski kólikti aýystyryp, jolaýshylarǵa bilet berý júiesin ashyq etý qajet. Qalalyq mobildilik basqarmasyna (Telibaevqa) qalda modelin ýnifikatsiialaý sharalaryn qarastyrýdy tapsyrdym. Bul sharalardyń basty maqsaty — qalalyqtarǵa sapaly kólik qyzmetin kórsetý jáne jolaýshy tasymalynyń qaýipsizdigin qamtamasyz etý.
