Bilim jáne ǵylym ministri Erlan Saǵadiev Túrkistan oblysy Maqtaral aýdany Firdoýsi aýylynda 1 qyrkúiekte hidjab kiip kelgen oqýshylardyń mektepke nelikten kirgizilmegenin Úkimet otyrysynan keiin klýarda aitty, dep habarlaidy Vaq.kz tilshisi.
Vedomstvo basshysynyń aitýynsha, oramal taqqan oqýshylardy mektepke kirgizbeý týraly ózi tapsyrma bergen.
«Zań boiynsha dini kiimmen mektepke barýǵa bolmaidy. Biz ol jaqqa (Túrkistan oblysy, Maqtaral aýdany, Firdoýsi aýylyna – red. eskertp.) arnaiy komissiia jiberdik. Oqýshylardyń ata-anasymen áńgime júrgizip, bir sheshimge kelemiz degen úmittemin. Ol jerde ýákiletti organdar, ákimdik ókilderi bar jáne biz barlyǵymyz biryńǵai komissiia quryp, osy máseleni sheshýimiz kerek. Meniń tapsyrmam boiynsha oramal taqqan oqýshylar mektepke kirmeidi. Mundai jaǵdai Aqtóbede de bolǵan», - dep qorytyndylady Saǵadiev.
Eske sala ketsek, Hamza Asadullah esimdi Facebook qoldanýshysy 1 qyrkúiek kúni Firdoýsi aýylynda bolǵan oqiǵa túsirilgen videony jelige júktedi. Kadrda oramal taǵyp, uzyn kóilek kigen bir top qyz mektep basshylyǵynyń ruqsatynsyz oqý ǵimaratyna kirýge tyrysýda. Alaida sol jerde turǵan quqyq qorǵaý qyzmetkerleri men mekeme basshylary olardy kirgizbei qoidy.
Jeli qoldanýshylary qaldyrǵan pikirlerge qarasaq, hidjab kigendi qoldaityndar men kerisinshe mektep formasyn ustaný kerek degenderdiń sany ekige bólindi.
