Qazaqstandyq ónertapqyshtar qulaqqappen mýzyka tyńdaýǵa áýes jaiaý júrginshilerdiń ómirin saqtap qalýǵa arnalǵan mobildi qosymshacyn oilap tapty.
Elimizde jaiaý júrginshilerdiń qatysýymen bolatyn jol apattary kóbeimese, azaimai otyr. Máselen, Astanada jyl basynan 170-ten astam jol kólik oqiǵasy tirkelgen.
«Zardap shegýshilerdiń aitarlyqtai bóligi qulaqqap taqqan jastar. Qurylǵyny qulaǵynan sheshpeitin olar, kóbine syrtqy dybysty estimei, sońy qaiǵyly jaǵdaiǵa alyp keletin jaǵdaiǵa ushyraidy», – deidi jol politsiiasy qyzmetkerleri.
Astana qalalyq IID baspasóz qyzmetiniń jetekshisi Sofia Qylyshbekovanyń aqparatynsha, jol apattarynyń 81-i jaiaý júrginshilerdiń kinásynan bolǵan.
«Jaiaý júrginshiler kei kezde qulaqtaryna taspa kiip alyp, jan-jaǵyna qaramai, joldy kesip ótedi. Júzden astam jaiaý júrginshi dene jaraqatyn alǵan. Onyń ishinde tirkelgen apattyń 11-i ókinishke orai qaiǵyly oqiǵamen aiaqtaldy. Ásirese temirjol ótpelerinen ótkende óte saq bolý kerek. Óitkeni avtokólikke qaraǵanda temirjol kóligi óte qaýipti, tez toqtai almaityn qural bolyp esepteledi», – dedi S.Qylyshbekova.
Qulaqqap taqqan melomandardy kóshede apattardan saqtaý maqsatynda almatylyq jas ónertapqyshtar «Safe and Sound» qosymshasyn oilap tapty. Nazarbaev Ziiatkerlik mektebiniń oqýshylary Jáńgir Siranov pen Jánibek Manabaev óz innovatsiialaryn jaz mezgilinde Astana qalasynda ótken Ulttyq robototehnika Olimpiadasynda tanystyryp, júldeli oryndy ielengen bolatyn. Olardyń aitýynsha, álemde balamasy joq mobildik baǵdarlama biraz adamnyń ómirin saqtap qalýy múmkin.
«Joba týraly ideia qulaqqap taqqan qyzdy, avtobýs qaǵyp ketkeni týraly jaǵa ustatarlyq videony kórgennen keiin paida boldy. Artynsha jol apatynyń aldyn alýǵa arnalǵan osyndai qosymshany 3 aidyń ishinde oilap taptyq», – deidi joba avtorlarynyń biri Jáńgir Siranov.
Jáńgirdiń áriptesi Jánibektiń aitýynsha, búginde mobildik qosymsha jan-jaqty testilenip, jetildirilýde. Ol ártúrli klimattyq jaǵdailarda synaqtan ótkizilýde.
Atap ótilgendei, qosymshany ár qoldanýshy ózi paidalanatyn qulaqqap baptaýlary boiynsha ornatýy kerek. Mobildik qosymsha áýendi bar daýysynda tyńdap kele jatqan adamǵa ózine qarai júiitkigen kólikti týraly birden belgi beredi. Iaǵni «Safe and Sound» qosymshasy smartfonnyń dybys kúsheitkishin avtomatty túrde basyp tastaidy.
Qosymsha aldaǵy 2-3 aidyń kóleminde barshaǵa qoljetimdi bolady dep josparlanýda.
Derekkózi: 24.kz
