Qazaqstandyq belgili shahmatshy Dinara Sádýaqasova Úndistanda ótetin dúniejúzilik shahmat olimpiadasyna qatyspaityn boldy. Bul týraly ol áleýmettik jelidegi paraqshasynda jazdy, dep habarlaidy "Ult aqparat".
«Osy jazda men Úndistanda ótetin Dúniejúzilik shahmat olimpiadasyna qatysýdan bas tartý týraly sheshim qabyldadym. Birqatar mindettemelerge bailanysty jaýapty sharaǵa daiyndala almadym. Degenmen aldaǵy jarystarǵa mindetti túrde qatysamyn degen senimdemin. Bul úshin negizgi faktor - oqytýdyń tiisti deńgeiine qajetti barlyq resýrstyń jetkilikti mólsheri», - dep jazdy ol Instagram-da.
Sondai-aq, shahmatshy jarysqa qatysatyn sportshylarǵa sáttilik tiledi.
«Árine, búgin men barsha qazaq sportshylaryna kúsh-qýat, sáttilik tileimin. Áriptesterimniń abyroimen óner kórsetip, joǵary kásibi sheberlikterin kórsete alatynyna senimdimin», - deidi Dinara.
Eske salaiyq, buǵan deiin shahmattan Qazaqstan áielder quramasynyń jattyqtyrýshysy Aleksandr Moiseenko aldaǵy Dúniejúzilik shahmat olimpiadasynda komanda aldynda úzdik úshtikke ený mindeti turǵanyn aitqan bolatyn.
28 shilde men 10 tamyz aralyǵynda Úndistannyń Chennai qalasynda shahmatshylardyń 44-shi Olimpiadasy ótedi.
