© Photo: STsK
«Ulttyq saraptama ortalyǵy» ShJQ RMK basqarma tóraǵasynyń burynǵy orynbasary Sádýaqas Baiǵabylov ortalyq filialy direktoryn basqa qyzmetke aýystyrý úshin 2,5 myń dollar para aldy degen kúdikke ilindi.
Bul týraly QR DSM Sanitarlyq-epidemiologiialyq baqylaý komitetiniń baspasóz qyzmeti habarlady.
«2023 jylǵy 14 shildede QR Densaýlyq saqtaý ministrliginiń Sanitariialyq-epidemiologiialyq baqylaý komiteti «Ulttyq saraptama ortalyǵy» ShJQ RMK bazasynda onyń filialdarynyń basshylary men qyzmetkerleriniń qatysýymen QR Sybailas jemqorlyqqa qarsy is-qimyl agenttigi Astana qalasy boiynsha departamentiniń «Ulttyq saraptama ortalyǵy» ShJQ RMK Jetisý oblystyq filialynyń direktory A. Mankeev pen «Ulttyq saraptama ortalyǵy» ShJQ RMK tóraǵasynyń orynbasary S. Baigabýlovqa qatysty usynysy qaraldy.
Sotqa deiingi tergep-tekserý barysynda A. Mankeev qyzmet boiynsha aýysý maqsatymen óziniń basshysy S. Baigabýlovqa («Ulttyq saraptama ortalyǵy» ShJQ RMK tóraǵasynyń burynǵy orynbasary - red.) aqsha qarajatyn bergeni anyqtaldy», - delingen habarlamada.
Aita keteiik, Sádýaqas Baiǵabylov 2023 jylǵy 18 mamyrda «Ulttyq saraptama ortalyǵy» ShJQ RMK tóraǵasynyń orynbasary qyzmetinen bosatylǵan.
«Laýazymdy adamdardyń sybailas jemqorlyq qylmystyq quqyq buzýshylyqtar jasaýy azamattyq qoǵamda teris kórinisterge ákeledi jáne sanitariialyq-epidemiologiialyq qyzmet organdarynyń imidji men iskerlik bedelin tómendetedi. Osyǵan bailanysty sybailas jemqorlyq pen ózge de buzýshylyqtardy aldyn alýǵa, jolyn kesýge jáne boldyrmaýǵa baǵyttalǵan profilaktikalyq jumys - sala úshin negizgi basymdyqtardyń biri bolyp tabylady.
Sondai-aq qarastyrylǵan jaýapkershilikterdi (qylmystyq, ákimshilik, tártiptik) taldai otyryp, sybailas jemqorlyqqa qarsy zańnamany saqtaý máselesi de talqylandy.
Keńeske qatysýshylardyń basty nazary sybailas jemqorlyqqa qarsy is-qimyl týraly zańdy qatań saqtaý jáne óziniń qyzmettik mindetterin adal oryndaýdyń qajettigine aýdaryldy», - delingen komitet habarlamasynda.
Eske salsaq, Ashat Mankeev biyl naýryz aiynda ustalǵan.
