Qyzylorda qalalyq jastar resýrstyq ortalyǵynyń basshysy Sabyrjan Keńshilik elimizde eriktilerge úlken qoldaý jasalyp jatqanyn atap ótti. Sondai-aq ol QazAqparat tilshisine bul turǵyda oi-pikirin bildirip, ózi basshylyq jasaityn ortalyqtyń aldaǵy jospary jóninde áńgimelep berdi.
«Memleket basshysy Qasym-Jomart Toqaevtyń qatysýymen ótken respýblikalyq volonterler front-ofisiniń ashylýynda maǵan Qyzylorda qalasynda qolǵa alynǵan «Jeńis» jobasy jóninde keńinen aityp berýge múmkindik týdy. Atynan kórinip turǵanyndai, bul joba maidangerler men tyl ardagerlerine arnalǵan. Joba boiynsha qart kisilerge dári-dármek, ózge de qajettiliktermen qamtamasyz etýge mán beriledi. Qazirgi tańda bul baǵytta naqty jumystar atqaryp kelemiz. Ardagerlerge kómek kórsetip, olardyń muń-muqtajyna kóńil bólemiz. Aita keterligi, joba óziniń tiimdiligin dáleldei tústi. Sondyqtan aldaǵy ýaqytta bul baǵytta júieli jumystar jalǵasa beredi», - dedi S. Keńshilik.
Respýblikalyq volonterler front-ofisiniń ashylýynda tikelei efirde elimizdiń eki aimaǵymen bailanys ornatyldy. Telekópir arqyly Almaty jáne Qyzylorda qalalarynda volonterler jumysy jóninde baiandaldy. Memleket basshysyna Qyzylorda oblysyndaǵy «Eko saqshylary» jobasy jóninde maǵlumat berildi.
«Respýblikalyq shara barysynda QR Prezidenti elimizdegi volonterler úlesin arttyrý qajettiligine toqtaldy. Sondai-aq, burynnan aitylyp júrgen volonterlikti eńbek ótiline qosý jónindegi usynys qoldaý tapty. Óitkeni, osy baǵytta birshama problema týyndap jatatyn. Árbir jas qyzmetke ornalasý aldynda eńbek ótili máselesine kezigetin. Volonterlik qyzmetti eńbek ótili retinde sanaý qiyndyqty jeńildetedi. Bul turǵyda tiisti zańdarǵa ózgerister engizý máselesi qolǵa alynatyn boldy. Búgingi kúnderi qalalyq jastar resýrstyq ortalyǵynyń bastamasymen oblys ortalyǵynda birqatar is-sharalardy júzege asyrý josparda bar. Bizde eriktiler korpýsy ashyldy. Onda eriktilerdi arnaiy oqytýǵa nazar aýdarylady. Qazir mektepter janynan eriktiler klýby ashyldy.
Birikken Ulttar Uiymy bekitken volonterlik qyzmettiń 14 túri bar. Bizde áleýmettik jáne ekologiialyq baǵyttaǵy eriktiler qyzmetine ǵana mán beriledi. Endigi kezekte osy maqsatta nasihat sharalaryn qolǵa aldyq. Solardyń biri retinde ekologiialyq eriktilerdi aitýǵa bolady. Bul baǵytta meditsinaǵa qyzyǵýshylyǵy bar stýdentter men oqýshylar volonter bola alady. Ózge de baǵyttar boiynsha jumys jasaýǵa kóńil bólinedi», - dedi ortalyq basshysy.
Onyń aitýynsha, aldaǵy josparda jastardy volonterlik turǵyda oqytý máselesine nazar aýdarylady. Ol jumystar óz deńgeiinde júzege asyrý - negizgi mindettiń biri.
«Qazaq halqynda jabyrqaǵannyń janynan tabylyp, olarǵa qoldaý kórsetý - burynnan bar qasiet. Qarapaiym tirshiligine kóz salsaq, asar jasaý, qinalǵan adamǵa qol ushyn berý sekildi qasietter áli kúnge deiin jalǵasyn taýyp otyr. Eriktiler isi sol jaqsylyqtyń jalǵasy ispettes. Ol jastardyń boiynda otansúigishtik, patriottyq, eljandylyq, janashyrlyq sezimderdi oiatady», - dedi S.Keńshilik.
.jpeg)