Keńes Odaǵy Batyrynyń uly atanǵan Anatolii Biriýkov Máskeý men Chehov turǵyndarynyń úreiine ainaldy. «Balalar ańshysy» degen laqap atqa ie bolǵan maniak bir aidyń ishinde bes sábidi urlap, zorlap, óltirgen. Tergeýshiler uzaq ýaqyt boiy ony izdep, búkil Máskeý politsiiasyn aiaǵynan tik turǵyzdy. Alaida qandyqol qylmyskerdiń ustalǵany ákesi general ári Keńes Odaǵynyń Batyry Nikolai Biriýkov úshin aýyr soqqy boldy, dep habarlaidy ult.kz.
Betindegi tyrtyq taǵdyryn ózgertti
Anatolii Biriýkov 1939 jyly Máskeý oblysyndaǵy Chehov qalasynda dúniege kelgen. Onyń ákesi Nikolai Biriýkov — Uly Otan soǵysynyń ardageri, general-leitenant ári Keńes Odaǵynyń Batyry edi. Ol ulyn qatal tártippen tárbielep, bolashaǵynan zor úmit kútti.
Alaida Anatoliidiń balalyq shaǵynda bolǵan oqiǵa onyń ómirine úlken iz qaldyrdy. Segiz jasynda ákesiniń patrondaryn bólshektemek bolǵan bala jarylys saldarynan aýyr jaraqat alyp, betinde ómir boiy ketpeitin tyrtyq paida boldy. Keiin ol bul jarany jurtqa qainaǵan sýǵa kúiip qalǵanynan dep túsindirip júrgen.
Tyrtyqtan keiin kórshileri ony mazaqtai bastaǵan. Sonyń áserinen Anatolii tuiyqtalyp, adamdardan alshaqtai tústi. Soǵan qaramastan mektepte jaqsy oqyp, ustazdarynyń maqtaýyna ie boldy. Ákesiniń jolyn qýmai, slesar mamandyǵyn meńgerip, qurylys salasynda jumys istedi. Keiin otbasyn quryp, eki qyzdyń ákesi atandy.
Alǵashqy qylmystary jazasyz qaldy
Biriýkovtyń balalarǵa degen qaýipti áýestigi 1971 jyly baiqala bastady. Ol balalar emhanasynyń janynda turǵan arbamen birge sábidi alyp ketpek bolǵan. Anasy der kezinde baiqap qalyp, shý kótergen soń er adam ustaldy. Biraq Biriýkov ózin «qaraýsyz qalǵan balaǵa sabaq bolsyn dep ákettim» dep aqtap shyqqan. Politseiler oǵan senip, bosatyp jiberedi.
Bir jyldan keiin ol taǵy bir balany urlamaq bolyp qolǵa tústi. Kei derekterde onyń úsh jylǵa sottalǵany aitylsa, kei málimette jazadan qutylyp ketkeni kórsetiledi. Osy oqiǵadan keiin áieli onymen ajyrasyp ketken.
Máskeýdi dúrliktirgen qandy qylmystar
1977 jyldyń kúzinde Biriýkov qaitadan qylmysqa kiristi. Alǵashqy qurbany — úsh ailyq qyz bala boldy. Maniak balany qaraýsyz turǵan arbadan alyp ketip, podezge kirgizgen. Náresteniń jylaǵanynan qoryqqan ol sábidi pyshaqtap óltirip, qashyp ketken.
Biraq bul onyń sońǵy qylmysy bolmady. Araǵa úsh kún salyp taǵy bir úsh ailyq qyz joǵalyp ketti. Bir aidan keiin onyń denesi qoqys arasynan tabylǵan. Tergeýshiler eki qylmystyń da bir adamnyń qolymen jasalǵanyn túsingenimen, naqty kúdiktini anyqtai almady.
Keiin taǵy bir sábi urlandy. Bul joly Biriýkov zeinetker áieldiń qolyndaǵy balany julyp alyp qashqan. Birneshe kúnnen keiin zorlanǵan sábidiń denesi tabyldy. Osydan keiin Máskeýde balalaryn qaraýsyz qaldyrǵan ata-analar arasynda úrei kúsheidi.
Maniakty qalai ustady?
Politsiia maniaktyń fotorobotyn jasap, izdeýdi kúsheitti. Biriýkov ańdýdyń kóbeigenin túsinip, qylmystaryn týǵan jeri Chehovta jalǵastyrmaq boldy. Onda da eki sábi urlanyp, keiin óli kúiinde tabyldy.
1977 jyldyń 21 qazanynda ol taǵy bir qyzdy urlamaq bolǵan kezde anasy baiqap qalyp, aiǵai kóteredi. Qýǵynnan qutylý úshin Biriýkov sábidi jerge tastap, qashyp ketedi. Bala aman qalǵanymen, kýágerler onyń túrin anyq kórip úlgergen. Osydan keiin jasalǵan fotorobot tergeýshilerdi naqty kúdiktige alyp keldi.
Kóp uzamai politsiia Biriýkov jumys isteitin qurylys mekemesine baryp, qyzmetkerlerden onyń kim ekenin anyqtaidy. Maniak sol kúni óz úiinde ustaldy. Tergeý kezinde ol bes sábidi óltirgenin moiyndap, qylmystaryn egjei-tegjeili aityp bergen.
Ákesiniń renishi
Anatolii Biriýkov alǵashynda ákesi ózin qutqaryp qalady dep sengen. Nikolai Biriýkov ta bastapqyda ulynyń mundai qylmysqa barǵanyna senbei, oǵan tájiribeli advokat jaldaǵan. Alaida sot protsesi barysynda dálelder tolyq rastalǵan soń, general kópshilik aldynda ulynan bas tartty.
Saraptama Biriýkovty esi durys dep tanydy. Sot ony ólim jazasyna kesti. Maniak birneshe ret ózine qol jumsamaq bolǵanymen, áreketteri sátsiz aiaqtalǵan. Keiin ol keshirim surap túrli organdarǵa ótinish jazǵanymen, bári keri qaitaryldy.
Anatolii Biriýkov 1979 jyldyń 24 aqpanynda atyldy. Ol 40 jasqa tolǵannan keiin kóp uzamai ólim jazasyna kesildi.
