كەڭەس وداعى باتىرىنىڭ ۇلى اتانعان اناتوليي بيريۋكوۆ مەسكەۋ مەن چەحوۆ تۇرعىندارىنىڭ ٷرەيٸنە اينالدى. «بالالار اڭشىسى» دەگەن لاقاپ اتقا يە بولعان مانياك بٸر ايدىڭ ٸشٸندە بەس سەبيدٸ ۇرلاپ, زورلاپ, ٶلتٸرگەن. تەرگەۋشٸلەر ۇزاق ۋاقىت بويى ونى ٸزدەپ, بٷكٸل مەسكەۋ پوليتسيياسىن اياعىنان تٸك تۇرعىزدى. الايدا قاندىقول قىلمىسكەردٸڭ ۇستالعانى ەكەسٸ گەنەرال ەرٸ كەڭەس وداعىنىڭ باتىرى نيكولاي بيريۋكوۆ ٷشٸن اۋىر سوققى بولدى, دەپ حابارلايدى ult.kz.
بەتٸندەگٸ تىرتىق تاعدىرىن ٶزگەرتتٸ
اناتوليي بيريۋكوۆ 1939 جىلى مەسكەۋ وبلىسىنداعى چەحوۆ قالاسىندا دٷنيەگە كەلگەن. ونىڭ ەكەسٸ نيكولاي بيريۋكوۆ — ۇلى وتان سوعىسىنىڭ ارداگەرٸ, گەنەرال-لەيتەنانت ەرٸ كەڭەس وداعىنىڭ باتىرى ەدٸ. ول ۇلىن قاتال تەرتٸپپەن تەربيەلەپ, بولاشاعىنان زور ٷمٸت كٷتتٸ.
الايدا اناتولييدٸڭ بالالىق شاعىندا بولعان وقيعا ونىڭ ٶمٸرٸنە ٷلكەن ٸز قالدىردى. سەگٸز جاسىندا ەكەسٸنٸڭ پاتروندارىن بٶلشەكتەمەك بولعان بالا جارىلىس سالدارىنان اۋىر جاراقات الىپ, بەتٸندە ٶمٸر بويى كەتپەيتٸن تىرتىق پايدا بولدى. كەيٸن ول بۇل جارانى جۇرتقا قايناعان سۋعا كٷيٸپ قالعانىنان دەپ تٷسٸندٸرٸپ جٷرگەن.
تىرتىقتان كەيٸن كٶرشٸلەرٸ ونى مازاقتاي باستاعان. سونىڭ ەسەرٸنەن اناتوليي تۇيىقتالىپ, ادامداردان الشاقتاي تٷستٸ. سوعان قاراماستان مەكتەپتە جاقسى وقىپ, ۇستازدارىنىڭ ماقتاۋىنا يە بولدى. ەكەسٸنٸڭ جولىن قۋماي, سلەسار ماماندىعىن مەڭگەرٸپ, قۇرىلىس سالاسىندا جۇمىس ٸستەدٸ. كەيٸن وتباسىن قۇرىپ, ەكٸ قىزدىڭ ەكەسٸ اتاندى.
العاشقى قىلمىستارى جازاسىز قالدى
بيريۋكوۆتىڭ بالالارعا دەگەن قاۋٸپتٸ ەۋەستٸگٸ 1971 جىلى بايقالا باستادى. ول بالالار ەمحاناسىنىڭ جانىندا تۇرعان اربامەن بٸرگە سەبيدٸ الىپ كەتپەك بولعان. اناسى دەر كەزٸندە بايقاپ قالىپ, شۋ كٶتەرگەن سوڭ ەر ادام ۇستالدى. بٸراق بيريۋكوۆ ٶزٸن «قاراۋسىز قالعان بالاعا ساباق بولسىن دەپ ەكەتتٸم» دەپ اقتاپ شىققان. پوليتسەيلەر وعان سەنٸپ, بوساتىپ جٸبەرەدٸ.
بٸر جىلدان كەيٸن ول تاعى بٸر بالانى ۇرلاماق بولىپ قولعا تٷستٸ. كەي دەرەكتەردە ونىڭ ٷش جىلعا سوتتالعانى ايتىلسا, كەي مەلٸمەتتە جازادان قۇتىلىپ كەتكەنٸ كٶرسەتٸلەدٸ. وسى وقيعادان كەيٸن ەيەلٸ ونىمەن اجىراسىپ كەتكەن.
مەسكەۋدٸ دٷرلٸكتٸرگەن قاندى قىلمىستار
1977 جىلدىڭ كٷزٸندە بيريۋكوۆ قايتادان قىلمىسقا كٸرٸستٸ. العاشقى قۇربانى — ٷش ايلىق قىز بالا بولدى. مانياك بالانى قاراۋسىز تۇرعان اربادان الىپ كەتٸپ, پودەزگە كٸرگٸزگەن. نەرەستەنٸڭ جىلاعانىنان قورىققان ول سەبيدٸ پىشاقتاپ ٶلتٸرٸپ, قاشىپ كەتكەن.
بٸراق بۇل ونىڭ سوڭعى قىلمىسى بولمادى. اراعا ٷش كٷن سالىپ تاعى بٸر ٷش ايلىق قىز جوعالىپ كەتتٸ. بٸر ايدان كەيٸن ونىڭ دەنەسٸ قوقىس اراسىنان تابىلعان. تەرگەۋشٸلەر ەكٸ قىلمىستىڭ دا بٸر ادامنىڭ قولىمەن جاسالعانىن تٷسٸنگەنٸمەن, ناقتى كٷدٸكتٸنٸ انىقتاي المادى.
كەيٸن تاعى بٸر سەبي ۇرلاندى. بۇل جولى بيريۋكوۆ زەينەتكەر ەيەلدٸڭ قولىنداعى بالانى جۇلىپ الىپ قاشقان. بٸرنەشە كٷننەن كەيٸن زورلانعان سەبيدٸڭ دەنەسٸ تابىلدى. وسىدان كەيٸن مەسكەۋدە بالالارىن قاراۋسىز قالدىرعان اتا-انالار اراسىندا ٷرەي كٷشەيدٸ.
مانياكتى قالاي ۇستادى?
پوليتسييا مانياكتىڭ فوتوروبوتىن جاساپ, ٸزدەۋدٸ كٷشەيتتٸ. بيريۋكوۆ اڭدۋدىڭ كٶبەيگەنٸن تٷسٸنٸپ, قىلمىستارىن تۋعان جەرٸ چەحوۆتا جالعاستىرماق بولدى. وندا دا ەكٸ سەبي ۇرلانىپ, كەيٸن ٶلٸ كٷيٸندە تابىلدى.
1977 جىلدىڭ 21 قازانىندا ول تاعى بٸر قىزدى ۇرلاماق بولعان كەزدە اناسى بايقاپ قالىپ, ايعاي كٶتەرەدٸ. قۋعىننان قۇتىلۋ ٷشٸن بيريۋكوۆ سەبيدٸ جەرگە تاستاپ, قاشىپ كەتەدٸ. بالا امان قالعانىمەن, كۋەگەرلەر ونىڭ تٷرٸن انىق كٶرٸپ ٷلگەرگەن. وسىدان كەيٸن جاسالعان فوتوروبوت تەرگەۋشٸلەردٸ ناقتى كٷدٸكتٸگە الىپ كەلدٸ.
كٶپ ۇزاماي پوليتسييا بيريۋكوۆ جۇمىس ٸستەيتٸن قۇرىلىس مەكەمەسٸنە بارىپ, قىزمەتكەرلەردەن ونىڭ كٸم ەكەنٸن انىقتايدى. مانياك سول كٷنٸ ٶز ٷيٸندە ۇستالدى. تەرگەۋ كەزٸندە ول بەس سەبيدٸ ٶلتٸرگەنٸن مويىنداپ, قىلمىستارىن ەگجەي-تەگجەيلٸ ايتىپ بەرگەن.
ەكەسٸنٸڭ رەنٸشٸ
اناتوليي بيريۋكوۆ العاشىندا ەكەسٸ ٶزٸن قۇتقارىپ قالادى دەپ سەنگەن. نيكولاي بيريۋكوۆ تا باستاپقىدا ۇلىنىڭ مۇنداي قىلمىسقا بارعانىنا سەنبەي, وعان تەجٸريبەلٸ ادۆوكات جالداعان. الايدا سوت پروتسەسٸ بارىسىندا دەلەلدەر تولىق راستالعان سوڭ, گەنەرال كٶپشٸلٸك الدىندا ۇلىنان باس تارتتى.
ساراپتاما بيريۋكوۆتى ەسٸ دۇرىس دەپ تانىدى. سوت ونى ٶلٸم جازاسىنا كەستٸ. مانياك بٸرنەشە رەت ٶزٸنە قول جۇمساماق بولعانىمەن, ەرەكەتتەرٸ سەتسٸز اياقتالعان. كەيٸن ول كەشٸرٸم سۇراپ تٷرلٸ ورگاندارعا ٶتٸنٸش جازعانىمەن, بەرٸ كەرٸ قايتارىلدى.
اناتوليي بيريۋكوۆ 1979 جىلدىڭ 24 اقپانىندا اتىلدى. ول 40 جاسقا تولعاننان كەيٸن كٶپ ۇزاماي ٶلٸم جازاسىنا كەسٸلدٸ.
