Ýkrainanyń "Jańa kúshter qozǵalysy" oppozitsiialyq qozǵalysynyń jetekshisi, Odessa oblysynyń burynǵy gýbernatory Mihail Saakashvili Ýkraina prezidenti bolý nieti joǵyn málimdedi.
"Nastoiashee vremia" telearnasyna bergen suhbatynda Grýziianyń eks-prezidenti Mihail Saakashvili Ýkraina prezidenti etnikalyq ýkrain bolýy tiis ekenin aitty. Saakashvili "Ýkrainada qandai da bir etnikalyq top ókili bolý - salystyrmaly túsinik" ekenin aityp, "Ýkrainada týyp, búkil ómirin osy elde ótkizgen" adamnyń prezident bolýy tiis ekenin naqtylady.
Mihail Saakashvili Ýkraina ózine azamattyǵyn qaitaryp bergen soń saiasi qyzmetpen ainalysý nieti baryn bildirdi.
Jeltoqsannyń 8-i kúni Ýkraina qaýipsizdik qyzmeti Saakashvilidi Kievtegi páterinen ustap áketken edi. 11 jeltoqsanda Kiev soty Mihail Saakashvilidi úiqamaqqa alýdan bas tartty. Ýkraina bas prokýrory Iýrii Lýtsenko prokýratýranyń sot sheshimine apelliatsiialyq shaǵym túsiretinin málimdedi.
Tergeý oryndary Saakashvilidi "Ýkrainanyń eks-prezidenti Viktor Ianýkovichtiń jaqtastarynyń múddesi úshin, elde memlekettik tóńkeris jasamaqshy bolǵan" degen aiyp taqqan. Iýrii Lýtsenko saiasatker Reseide jasyrynyp júrgen ýkrainalyq biznesmen Sergei Kýrchenkodan óz qyzmeti úshin jarty million dollar qarjy alǵanyn málimdegen. Kýrchenko Saakashvilimen tanys emesin aitqan. Saakashvili bul aiyptardy teriske shyǵarady.
