Mihail Saakashvili Kievte 5 jeltoqsanda ótken mitingide Ýkraina prezidenti Petr Poroshenkony "satqyn" dep atady. Ol ýkrain halqyn Joǵarǵy Rada aldyna qarsylyq aktsiiasyna shyǵýǵa jáne is basyndaǵy prezidentti bilikten ketirýge shaqyrdy, dep jazady Azattyq.
Ol 5 jeltoqsanda qaýipsizdik qyzmetiniń ózin ustaýyn "arandatý" dep atap, ýkrain biligi men arnaiy qyzmetin Kremlmen bailanysy bar dep aiyptady. Saakashvilidiń ózi Reseimen qandai da bir bailanysy baryn joqqa shyǵaryp, ózin Resei prezidenti Vladimir Pýtinniń "basty jaýymyn" dep atady. Azattyqtyń Ýkrain redaktsiiasynyń videotransliatsiiasyna qaraǵanda, qarsylyq aktsiiasyna myńdaǵan adam qatysyp jatyr.
Grýziianyń eks-prezidenti, Odessa oblysynyń burynǵy gýbernatory Mihail Saakashvili Ýkrainada oppozitsiialyq "Jańa kúshter qozǵalysyn" basqarady. 2017 jyldyń jazynda ol ýkrain azamattyǵynan aiyrylǵan. 5 jeltoqsanda ýkrain arnaiy qyzmeti men politsiia Kievte Saakashvilidiń páterin tintip, ózin ustaǵan. Biraq jaqtastary qarsylasyp júrip, ony arnaiy qyzmet kóliginen shyǵaryp, bosatyp alǵan. Ýkraina biligi ony memlekettik tóńkeris jasamaq boldy jáne Viktor Ianýkovichke jaqyn oligarh Sergei Kýrchenkodan jarty million dollar qarjy aldy dep aiyptaidy.
Saakashvili jaqtastary ózin bosatyp alǵan soń narazy topty "Maidanǵa" barýǵa úgittep, "Ýkrainany prezident Petr Poroshenkonyń bandasynan" azat etýge úndedi.
"Ásker - bizdiń jaǵymyzda" degen Saakashvili beibit sherýdi qalaitynyn da aita ketti. Saiasatker jaqtastarymen birge Joǵarǵy radanyń ǵimaraty aldynda mitingisin jalǵastyrdy.
Poroshenkoǵa impichment jariialaýdy talap etken miting Kievte qazannyń ortasynan beri ótip keledi. Joǵarǵy Rada aldynda demonstranttar shatyr tikken.
