Grýziianyń burynǵy prezidenti Mihail Saakashvili "Grýziia taǵdyry sheshilip jatqan tusta eldi qutqarý úshin" 2 qazanda Tbilisige ushyp keletinin málimdedi. Ol kúni elde jergilikti sailaý ótedi. Keiingi kezde Ýkrainada turyp kelgen Saakashvili túrme qaýpine qaramastan, elge oralatynyn aitty.
"Grýziianyń taǵdyry sheshilip jatyr, Grýziianyń taǵdyry qyl ústinde, sol sebepti 2 qazan keshke bilet alyp qoidym. Sizderdiń saiasi tilekterińizdi qorǵaý úshin, Grýziiany qutqarý isine qatysý úshin oralamyn" dedi Saakashvili Facebook'ta jariialaǵan videoda. Ol sonymen birge ushaq biletiniń skrinin de salyp qoiǵan.
Premer-ministr Irakli Garibashvili "Saakashvili elge oralsa, politsiia ony ustap áketedi" dep málimdedi.
"Grýziia jerine qadam basqannan keiin birden ustalyp, túrmege jiberiledi" dedi Garibashvili. Onyń sózinen "Interfaks" agenttigi úzindi keltirdi.
2018 jyly maýsym aiynda grýzin soty Saakashvilidi "prezident bolyp turǵan tusta qyzmettik ókiletin asyra paidalandy" jáne "parlament músheleriniń soqqyǵa jyǵylýyna qatysty dálelderdi jasyrýǵa tyrysty" dep aiyptap, syrttai 6 jylǵa sottaǵan.
Qazir Grýziiada basqarýshy "Grýzin armany" partiiasy men Saakashvili qoldaityn oppozitsiia arasynda jaǵdai ýshyqqan. Oppozitsiia byltyr bilikti parlament sailaýynyń nátijesin burmalady dep aiyptaǵan. Al halyqaralyq baqylaýshylar sailaýdyń básekege sai jáne negizgi sailaý quqyqtary saqtalǵanyn aitqan.
Facebook'ta jariialaǵan videosynda Saakashvili jaqtastaryn kóshege shyǵyp, saiasi quqyqtary úshin kúresýge úndegen.
