Úkimet basshysy Baqytjan Saǵyntaev kommýnaldyq qyzmet tarifterin tómendetpegen óńir ákimderin synǵa aldy, dep habarlaidy Sputnik Qazaqstan tilshisi.
Premer-ministr Baqytjan Saǵyntaev ulttyq ekonomika ministri Timýr Súleimenovten gazben qamtý boiynsha Qyzylorda men Atyraý oblystarynda nege ózgeris joq ekenin surady.
"Biz obektivti túrde qarap shyqtyq. Bul eki óńirde onsyz da gaz tarifi tómen, bul ortaq mindetterge jaýap beredi. Ósim qarastyrylmaǵan", — dedi ministr.
Úkimet basshysy Súleimenovtiń bul jaýabyna qanaǵattanbady. Ol PIK, jolaqy, qoqys shyǵarý, lift boiynsha keibir óńirlerde nege tariftiń ózgergeni týraly maǵlumat joq ekenin surady.
"Másele olarda gazdyń tarifi tómen ekendiginde emes, halyqtyń memleket basshysynyń tapsyrmasynyń oryndalýyn kútip otyrǵany. Ákimdiktiń basqarýyndaǵy PIK, basqa da kommýnaldyq qyzmetter boiynsha, eger bul óńirlerde sheshim qabyldanbasa, bul prezidenttiń tapsyrmasyn oryndamaý degendi bildiredi. Qurmetti ákimder, buǵan jeke jaýap beresizder. Biz tiisti anyqtamany beremiz. Basqa óńirler tarifti ózgertken, al keibireýleri ártúrli syltaýmen sol kúii qalyp otyr. Muny qalai túsinýge bolady? Bylaisha aitqanda, monopolisterdiń jeteginde ketip otyrsyzdar", — de ashýlandy Saǵyntaev.
Premer-ministr 29 jeltoqsanda ótetin úkimet otyrysynda tarifterdi tómendetý máselesi taǵy qaralatynyn atap ótti.
"1 qańtarǵa deiin ýaqyt bar, sheshimderdi shyǵaryńyzdar. 29 jeltoqsan kúni úkimettiń taǵy bir otyrysy ótedi. Sol otyrysta tarif boiynsha sheshim shyǵarmaǵan ákimder baiandama jasasyn. Timýr Muratuly (ulttyq ekonomika ministri – avtor eskert.), sizge de qatysty", — dedi premer.
Saǵyntaev tarifterge qatysty Elbasy tapsyrmasynyń oryndalǵanyn barlyq qazaqstandyq sezinýi tiis ekenin taǵy bir márte atap ótti.
"Sol sebepten 1 qańtardan bastap barlyq qyzmet jańa tarifpen kórsetile bastaýy tiis. Tarifterdiń qalai eseptelinetinin halyqqa túsinikti jáne barynsha ashyq jariia etý kerek. Eger de tarifterdi tómendetpeseńizder, halyqtyń aldyna shyǵyp, sebebin túsindirińizder. Halyq pikirin aitsyn. Barynsha jariia ótkizý kerek. Bul - Elbasynyń qoiǵan talaby", — dedi úkimet basshysy.
