Qazaqstannyń birinshi, álemniń 20-raketkasy Elena Rybakina Ýimbldon týrniriniń tórtinshi ainalymyna shyqty, dep habarlaidy "Ult aqparat".
«Úlken dýlyǵa» jarysynyń 18-raketkasy bolyp tirkelgen, ótken aida 22-ge tolǵan qazaqstandyq tennisshi úshinshi ainalymda álemniń 46-raketkasy, amerikalyq, 28 jastaǵy Shelbi Rodjerspen sheberlik baiqasty.
Buǵan deiin qarsylastar eki márte kezdesip, bir-birden jeńiske jetken edi. Ótken jyly US Open dodasynda Rodjers 7:5, 6:1 esebimen utsa, eki apta buryn Rybakina Berlinde ese qaiyrǵan edi – 2:6, 6:3, 6:4.
Ýimbldonda úshinshi ainalymda amerikalyq sportshy kútpegen jerden álemniń 18-inshi, osy týrnirdiń 15-raketkasy, grekiialyq Mariia Sakkaridi 7:5, 6:4 esebimen utyp ketken edi.
Birinshi partiiada qos breik jasaǵan Elena qarsylasyn qinalmai jeńdi – 6:1.
Ekinshi sette esep 2:2 bolǵan mezette Rybakina breik jasap, óz geimin de ala bildi – 4:2. Sodan keiin matchty eispen bitirdi – 6:4.
Bir saǵat 6 minýtqa sozylǵan báseke barysynda Rybakina 8, qarsylasy bir ǵana eis jasai aldy. Qazaqstandyq tennisshi 8 breik-pointtyń úsheýin paidalandy.
Osylaisha Rybakina Ýimbldon dodasynda alǵash ret óner kórsetkenine qaramastan, tórtinshi ainalymyna shyǵyp otyr.
Qazaqstandyq tennisshi shirek finalǵa shyǵý úshin álemniń tórtinshi, osy jarystyń 2-raketkasy, Belarýs ókili Arina Sobolenkomen talasady. Ol dúniejúzilik reitingte 94-satyda turǵan kolýmbiialyq Mariia-Kamila Osorio Serranony 6:0, 6:3 esebimen tize búktirdi.
