Foto: ktf.kz
Elimizdiń birinshi, álemniń 10-raketkasy Elena Rybakina AQSh-taǵy Indian-Ýellste ótip jatqan ATP Masters 1000 sanatyndaǵy týrnirdiń finalyna shyqty, - dep habarlaidy "Ult aqparat".
Qazaqstan tennis federatsiiasynyń jazýynsha, Rybakina jartylai finalda álemniń 1-raketkasy, Polsha ókili Iga Shventekpen sheberlik baiqasty. Olar osyǵan deiin úsh ret kezdesip, sonyń ekeýinde qazaqstandyq tennisshi jeńgen edi.
Budan eki ai buryn Elena Aýstraliia ashyq chempionatynda álemniń 1-raketkasyn 6:4, 6:4 esebimen tize búktirgen.
Bul joly birinshi partiiada otandasymyz breikpen alǵa shyqty. Sodan keiin taǵy bir breikpen aiaqtady – 6:2. Rybakina ekinshi setti de breikpen bastady – 2:0. Taǵy bir breik – 4:0. Sodan keiin esep 5:1 bolyp, ózi dop bergende, eki matchbolyn paidalana almady. Degenmen matchty taǵy bir breikpen támamdady – 6:2.
Osylaisha Elena 1 saǵat 15 minýtqa sozylǵan oiynda 7 eis jasap, 5 breik-pointty túgel óz esebine jazdy. Qarsylasy 1 eis, 1 breikpen kózge tústi.
Qazaqstandyq tennisshi álemniń birinshi raketkasyn aiqyn basymdyqpen utyp, sporttyq karerasynda alǵash ret Indian-Ýells jarysynyń (júlde qory – 8,8 million AQSh dollary) finalyna ótti.
Ol sońǵy básekede álemniń 2-raketkasy, belorýssiialyq Arina Sobolenkomen bas júldeni sarapqa salady. Arina jartylai finalda álemniń 7-raketkasy, grekiialyq Mariia Sakkaridi joldan taidyrdy – 6:2, 6:3.
