Osydan birer jyl buryn oblys ortalyǵynyń ónersúier jurtshylyǵy úlken qýanyshqa bólendi. Óskemenniń eń kórikti jerinen qazaq drama teatry boi kóterdi. Aita ketý kerek, kóp jyldardan beri sheshimin tappai kele jatqan másele oblystyń burynǵy ákimi Berdibek Saparbaevtyń tikelei aralasýymen júzege asty. Búginde teatr óskemendikterdiń kózaiymyna ainalyp otyr. Onyń ústine osy teatrdyń janynan Jastar teatry jáne ashylyp, barsha jurtty qýantty.
Árine, munyń bári jaqsy-aq, biraq bir «átteń-aiy» bolmasa. Buǵan deiin oblystyq Jambyl atyndaǵy drama teatry atanyp kelgen mádeniet oshaǵy jańa ǵimaratqa kóshkennen keiin, nege ekenin kim bilsin, oǵan alyp jyraýymyzdyń aty qaita berilmedi. Endigi másele – osy teatrdyń ataýsyz turǵanynda. Qazir teatrdyń jańa ǵimaraty mańdaishasynda TEATR degen jalǵyz sóz jetimsirep tur. Zaty bar teatrdyń aty da bolýy kerek qoi. Kez kelgen oblystyq teatrdyń ózine laiyq ataýy bar.
Shyndyǵynda, bul teatrǵa marqum Rústem Esdáýletovtiń aty suranyp tur emes pe? Jalǵan dúniemen jastai qoshtasqan Rústem baýyrymyz osyndaǵy qazaq trýppasynyń irgetasyn qalaǵan rejisser boldy. Bilikti jas maman birneshe klassikalyq pesany sahnalap, az ýaqyttyń ishinde qazaq trýppasyn biik beleske kótere bildi. Qazan qalasynda ótken túrkitildes teatrlar arasyndaǵy baiqaýda shyǵysqazaqstandyq teatrdyń júldeger atanýy osy aitqanymyzǵa dálel.
Sol bir tusta respýblikalyq basylymdar men telearnalarda rejisser Rústem Esdáýletovtiń eńbegi erekshe atalyp jatty. Asanáli Áshimovtiń óskemendik kórermender aldynda Rústemdi «bolashaǵynan zor úmit kúttiretin jas rejisserlerdiń biri de biregeii» dep ataǵany esimizde. Dýaly aýyzdan shyqqan ataly sózdiń júzege asary sózsiz de edi, rejisserlik daryny jańa ashylyp, teatr óneri áleminde juldyzdai jarqyrap kele jatqan jas ǵumyr erte úzilmegende… Rústem talantty aqyn da bolatyn, kino salasyna da qadam basyp kele jatqan edi. Keiingiler ómirde osyndai daryndy jas jerlesteriniń bolǵanyn bilip júrýi úshin de jańa ǵimarattyń mańdaishasynda «Rústem Esdáýletov atyndaǵy drama teatry» dep jazylyp tursa, nur ústine nur bolmaq.
Ýaqyt shirkin netken júirik deseńizshi! Óner aspanynda endi jarqyrap kele jatqan daryn iesiniń juldyzdai aǵyp túskenine de birneshe jyldyń júzi bolypty. Qamshynyń sabyndai qysqa ǵumyrynda respýblikanyń kúlli óner qairatkerleri men ónersúier qaýymyn eren talantymen moiyndatyp ketken Rústem baýyrymyzdyń ortamyzdy oisyratyp ketkeni ókinishti-aq.
Murat ÁMIRENOV, Qazaqstan Respýblikasynyń mádeniet qairatkeri
Óskemen qalasy
"Jas Alash" gazeti
.jpg)