Tatarstan Prezidenti Rýstam Minnihanov Qazaqstandaǵy Tatar jáne bashqurt kongresiniń aktivimen kezdesti, dep habarlaidy QazAqparat tilshisi.
Kezdesý «Tatarstan - Jańa ǵasyr» teleradiokompaniiasynyń korrespondenttik pýnktiniń Qazmediada ótken ashylý saltanatynan keiin boldy. TR vitse-premeri, tatarlardyń dúniejúzilik kongresiniń «Milli Shýra» ulttyq keńesiniń tóraǵasy Vasil Shaihraziev moderator retinde sóz sóiledi.
Qazaqstandaǵy tatar jáne bashqurt kongresiniń basshysy, Qazaqstan halqy Assambleiasy keńesiniń múshesi, Tatarlardyń dúniejúzilik kongresiniń «Milli Shýra» ulttyq keńesiniń tóraǵasy Taýfik Karimov Prezident Rýstam Minnihanovke Qazaqstandaǵy tatarlar qaýymdastyǵynyń damýy týraly baiandady.
«Qazaqstan Prezidenti Nursultan Nazarbaevtyń jáne sizdiń Tatarstanǵa jasaǵan saparlaryńyz Astana men Qazan arasyndaǵy ekonomikalyq jáne mádeni yntymaqtastyqty damytýǵa zor yqpalyn tigizedi. Qazaqstandaǵy tatar halqynyń atynan Astanada ashylǵan «TJǴ» korrespondenttik pýnkti úshin alǵysymdy bildiremin. Biz osy maqsatta byltyr tamyz aiynda sizge Taldyqorǵanda ótinish bildirgen edik. Al endi Astananyń 20 jyldyǵyna orai jeke qatysýyńyzben saltanatty ashylý rásimin tamashalap otyrmyz. Reseiden tys jerdegi TJǴ-nyń alǵashqy korrespondenttik pýnkti aqparat taratý salasyna zor úlesin qosyp, ulttar arasyndaǵy dostastyqty nyǵaitady. Onda kórsetiletin baǵdarlamalar tek tatar halqyna emes, qazaqtar úshin de qyzyqty bolady. Sebebi bizdiń dinimiz de, dástúrimiz de, tilimiz de - bir, - dedi T. Karimov.
Onyń aitýynsha, dál qazir Qazaqtardyń dúniejúzilik qaýymdastyǵy men Tatarlardyń dúniejúzilik qaýymdastyǵy arasynda, sondai-aq, eki eldiń irgeli aqparattyq agenttikteri - QazAqparat jáne Tatar-Aqparat arasynda memorandýmǵa qol qoiý boiynsha jumystar atqarylyp jatyr.
Kezdesýge Qazaqstan tarapynan Qazaqstan halqy Assambleiasynyń tóraǵa orynbasary Islambek Saljanov, Qazaqtardyń dúniejúzilik qaýymdastyǵynyń tóraǵa orynbasary Arǵyn Ospanov, «QazAqparat» Halyqaralyq aqparat agenttiginiń bas direktory Asqar Omarov, Qazandaǵy QR Bas konsýly Erkin Tuqymov qatysty. Shara barysynda Tatarstannyń Qazaqstandaǵy jańadan taǵaiyndalǵan ýákiletti ókili Denis Valeev tanystyryldy.
