Prezidenttiń baspasóz hatshysy Rýslan Jeldibai elorda ataýyn Astana ataýyna qaitarý týraly usynysqa qatysty pikir bildirdi, - dep habarlaidy "Ult aqparat".
"Parlamenttegi depýtattar toby elordanyń burynǵy Astana ataýyn qaitarý týraly usynys bildirgeni málim. Depýtattardyń bul bastamasy týraly Prezident habardar. Halyq qalaýlylary, óz kezeginde turǵyndarmen kezdesýlerde aitylǵan usynystarǵa, sondai-aq, referendým kezinde azamattardyń kóptegen ótinishterine súiendi. Májilis depýtattarynyń usynysy Memleket basshysynyń kelisimimen Konstitýtsiialyq zań jobasyna engizildi. Prezident Qazaqstannyń qazirgi memlekettiligin nyǵaitýda jáne elordanyń irgesin qalaýda N.Á. Nazarbaevtyń sheshýshi rol atqarǵany tarihi fakt dep sanaidy. Sondyqtan Tuńǵysh Prezident atyndaǵy basqa da nysandar óz ataýlaryn saqtap qalýy tiis", - dep jazdy Jeldibai Facebook-paraqshasynda.
