Ishki ister ministri Erlan Turǵymbaev 1 naýryz kúni elimizde "zańsyz mitingiler" ótkizýge tyrysqan 80-ge tarta adamnyń ustalǵanyn málim etti, dep habarlaidy "Ult aqparat".
«Bas prokýratýranyń birneshe márte jasaǵan eskertýine qaramastan, keshe azamattardyń bir bóligi tyiym salynǵan ekstremistik uiym usynǵan oryndarda sanktsiialanbaǵan miting ótkizýge tyrysty. Sol úshin politsiia qoǵamdyq tártiptiń buzylýyn aldyn alý sharalaryn júrgizdi. Osylaisha, ishki ister organdaryna, politsiia organdaryna 80-ge tarta azamat jetkizildi. Profilaktikalyq jumystardan keiin bári úiine jiberildi. Tórt adam ákimshilik jaýapkershilikke tartyldy – biri aiyppul arqalasa, úsheýi qamaqqa alyndy. Olardyń ekeýi politsiia qyzmetkerlerine qarsylyq kórsetse, bireýi sanktsiialanbaǵan miting uiymdastyrǵany úshin ustaldy», - dedi Erlan Turǵymbaev búgin Úkimet otyrysynan keiin tilshilerge.
Ministr óz sózinde azamattar úsh saǵattan artyq ustalmaǵanyn aitady.
«Bizde beibit jiyndar, sherýler men demonstratsiialar týraly zań bar. Ol jerde talaptar naqty jazylǵan. Beibit jiyn ótkizgisi keletin azamattar atqarýshy bilik organdaryna ótinim berip, ruqsat alyp, oryny, ýaqyty men keletin azamattar sanyn aiqyndaýy kerek. Bul jaǵdaida ol sharalar jasalmaǵan, ótinim berilmegen. Onyń ústine Bas prokýratýranyń 1 naýryzǵa bailanysty eskertpesi bar. Sondyqtan jiyn zańsyz boldy», - dedi ol.
Eske salaiyq, 28 aqpan kúni QR Bas prokýratýrasy qazaqstandyqtarǵa úndeý tastap, zańsyz mitingilerge qatyspaýǵa shaqyrǵan edi.
«Áleýmettik jelilerde zańsyz narazylyq aktsiialaryn ótkizýge shaqyrýlar taratylýda. Bul rette shyndyqqa janaspaityn, onyń ishinde áleýmettik jáne ulttyq alaýyzdyq pen arazdyqty qozdyrý belgilerimen aqparattar ornalastyrylýda. Zańsyz kópshilik is-sharalardy uiymdastyrý jáne oǵan qatysý Ákimshilik quqyq buzýshylyq týraly kodekstiń 488-baby boiynsha jaýaptylyqqa ákep soqtyratynyn eske salamyz. Osy árekettermen azamattardyń, uiymdardyń, qoǵamnyń nemese memlekettiń quqyqtary men zańdy múddelerine eleýli ziian keltirilgen jaǵdaida Qylmystyq kodekstiń 400-baby boiynsha jaýaptylyq kózdelgen.Áleýmettik jáne ulttyq arazdyqty qozdyrý, kórineý jalǵan aqparat taratýǵa jariia túrde shaqyrý zańmen tyiym salynǵan jáne mundai áreketter qylmystyq tártipte qýdalanatynyna nazar aýdaramyz (QK 174 jáne 274-baptary)», - delingen málimdemede.
