Belarýs eliniń Vitebsk qalasynda ótken «Slavian bazary» konkýrsynyń jeńimpazy Rýhiia Baidúkendi Nur-Sultan áýejaiynan ustazdary men jaqyndary kútip aldy, dep habarlaidy QazAqparat.
Qazaq ulttyq óner ýniversitetiniń oqytýshysy Elena Volovikova jeńimpaz shákirtin qarsy alý kezinde onyń Belarýs jerinde kórsetken ónerine baǵa berdi.
«Rýhiia bul joly án oryndaý kezinde batys tehnikasyn qoldanatyn kreativti mýzykant, vokalist bolýymen sýyrylyp shyqty. Onyń kórsetken óneri san qyrly boldy. Bul – vokalistiń qanshalyqty kásibi ekenidiginiń kórsetkishi. Ol ártúrli ádisterdi qoldana alady, jai án aityp qana qoimai, ózgerip otyrady. Al ondai deńgeidiń ar jaǵynda tynymsyz ári túpsiz eńbek jatyr. Týa bitti talant sáttilikke 50% ǵana sep bola alady. Qalǵany – eńbektiń arqasy. Iaǵni, kúndelikti sabaq pen kúndelikti jattyǵýlar jemisin berip jatyr. Bul jeńiske ol bir kúnde jete salǵan joq. Bala kúninen beri osyndai biikke órmelep, tyrmysyp jetti», - dedi Elena Volovikova.
Kásibi maman endi Rýhiia Baidúkenovaǵa óz áleýetin ashatyn jaqsy án jazǵyzyp, soǵan beineklip shyǵarý kerektigin aitady.
«Ol ár vokalistiń qolynan kele bermeitin qiyn ánderdi aitý arqyly joǵary deńgei kórsetti. Rýhiia bul mejeni baǵyndyrdy. Kúrdeli ánderdi minsiz oryndap qana qoimai, olarǵa jańa ár berdi. Iaǵni tanymal ánderge óz janynan mazmun qosty. Onyń oryndaý mánerinde sýretshiniń qoltańbasy bar. Ol shyrqaǵan ánder múldem basqa boiaýlarmen qanyǵyp shyǵa keledi», - dedi Volovikova.
Aita keteiik, 14 memleketten kelgen qatysýshy slavian elinen shyqqan kompozitordyń týyndysyn slavian tobyna jatatyn tildiń birinde orkestrdiń súiemeldeýimen oryndady. Baiqaý nátijesinde jerlesimiz Gran-pri iegeri atanyp, «Altyn lira» músinshesimen birge 20 myń AQSh dollaryna ie boldy.
Baiqaý jeńimpazy Rýhiia Baidúkendi Memleket basshysy Qasym-Jomart Toqaev arnaiy quttyqtady.
«Baiqaýǵa jalǵyz ózim bardym. Aldymen Belarýs astanasy Minskide prezident orkestrimen daiyndyq ótkizdik, sosyn Vitebskige bardyq. Baiqaý eki kúnge sozyldy, jeńiske jetetinime alǵashynda kúmándandym, sebebi qarsylastarym myqty boldy. Degenmen barynsha ózime senimdilik tanyttym», - deidi ol.
