Almaty oblysynda tuńǵysh ret Elbasy Nursultan Nazarbaevtyń «Bolashaqqa baǵdar: rýhani jańǵyrý» atty maqalasy aiasynda «Rýhani kerýen» jobasy bastaý aldy. Almaty oblystyq din isteri basqarmasy uiymdastyrǵan igi sharaǵa oblys ákiminiń orynbasary Jaqsylyq Omar arnaiy kelip, aq jol tiledi.
«Rýhani kerýen» jobasy barysynda oblysymyzdyń ziialy qaýym ókilderi jergilikti eldi mekenderdi aralap, óńirdiń tynys-tirshiligimen tanysady. Kerýenniń quramynda ár túrli salanyń bilikti de bilimdi 50 mamany bar. Atalmysh joba 3 aiǵa sozylady dep josparlanýda.
Kerýen músheleri óńirdegi qala, aýdandardy aralap, túsindirý jumystaryn júrgizedi. Taldyqorǵan qalasynyń «Jastar» saiabaǵynda oryn alǵan «Rýhani kerýen» jobasynyń saltanatty ashylýynda Almaty oblysy ákiminiń orynbasary Jaqsylyq Muqashuly sharanyń maqsaty men mindetin aita kele, kerýenge múshelerine aq jol tiledi.
– Álemdegi dini ahýaldyń qiyndyǵyna ózderińiz kýá bolyp júrsizder. Onyń salqyny bizge de tiiýde. Soǵan qarsy ekstremizmdi boldyrmaý jáne asyl dinimiz ben ejelden qalyptasqan ulttyq salt-dástúrimizdi jańǵyrtý maqsatynda osyndai jobany qolǵa aldyq. Igilikti shara kópshiligimiz úshin óte mańyzdy. «Rýhani kerýen» múshelerine aq jol jáne nátijeli jumys tileimin. Bul kerýen arqyly biz ásirese, jas urpaqqa din men salt-dástúrdiń egiz uǵymyn ekenin túsindirýimiz kerek. Ulttyq sana men ulttyq salt-dástúrdi, ulttyq sanany jeke dara bólip qaraý múmkin emes. Munyń barlyǵy bir tamyrdyń ózegindei dúnie ekenin kópshilikke túsindirýimiz kerek. Osy máselege oń nátije berý maqsatynda oblys ákiminiń qoldaýymen, oblystyq biýdjetten arnaiy qarjy bólinip, oblystyq din basqarmasy, keiinge taman dindi zertteý ortalyǵy quryldy. Osy sala mamandarynyń uiymdastyrýymen qolǵa alynǵan jumys nátijesi berekeli ári jemisti bolady dep oilaimyn, – dep igi shara jaily áńgimeledi.
Almaty oblysynda oryn alǵan kez-kelgen sharanyń basy-qasynda júrip, aqyl-keńesi men ómirlik tájiribesimen bólisip júretin oblystyq ardagerler keńesiniń tóraǵasy Ermek Kelemseiit ulttyq salt-dástúrimiz ben mádenietimizdi jandandyryp, jastardyń júregindegi Otanǵa, týǵan elge, jerge degen patriottyq sezimderin oiatý qazirgi kúnniń basty taqyryby ekenin tilge tiek etti. Almaty oblysynyń Qurmetti azamaty, kinoakter Álimǵazy Raiymbekov kerýen múshelerine aq batasyn arnady.
«Rýhani kerýen» jobasy aiasynda qurylǵan jumys toby eldi mekenderdi aralaý barysynda «Rýhani jańǵyrý: el erteńiniń bastaýy» taqyrybynda ziialy qaýym ókilderimen keleli kezdesý, «Densaýlyq – bolashaq kepili!» taqyrybynda dini sebeptermen ekpe, qan quiýdan bas tartqan azamattarmen kezdesip, túsindirme jumystary júrgiziledi. «Rýhani jańǵyrý: týǵan jer – altyn besik» atty sýret jáne kitap kórmesi men «Aqparattyq túsindirý
jumysy – dini saýattylyqty arttyryp, rýhani bailyǵymyzdy dáripteidi» taqyrybynda bilikti din tanýshy ǵalymdarmen dóńgelek ústel uiymdastyrylady. Deskrýktivti dini aǵym yqpalyna túsken azamattarǵa oń joldy nusqaý maqsatynda «Rýhani mura» atty kontserttik baǵdarlama, shyǵarmashylyq toptyń «Dertke daýa – Haq joly» atty qoiylymdary qoiylmaq.
Árbir Qazaqstan azamatynyń rýhani sanasyn jańǵyrtý, týǵan jerine degen súiispenshilik jáne patriottyq sezimderin arttyrý maqsatynda jolǵa shyqqan «Rýhani kerýen» tómendegi baǵyttar boiynsha óz jumystaryn júzege asyrady. 4-7 qyrkúiek aralyǵynda Jambyl, Qarasai, Talǵar aýdandarynda bolsa, 20-22 qyrkúiek kúnderi Aqsý, Sarqan, Alakól, 4-6 qazanda Panfilov, Uiǵyr, Raiymbek, 18-20 qazan kúnderi Enbekshiqazaq, Ile, Qapshaǵai, 1-3 qarasha aralyǵynda Kóksý, Kerbulaq, Balqash eldi mekenderine aialdasa, qarasha aiynyń 8-10 aralyǵynda Eskeldi, Tekeli, Qaratalda, 17 qarasha kúni Taldyqorǵan qalasynda kerýen sapary qorytyndylanbaq.
