Búgin Prezident ákimshiliginiń jetekshisi Áset Isekeshevtiń tóraǵalyǵymen Rýhani jańǵyrý baǵdarlamasyn iske asyrý jónindegi selektorlyq jiyn ótti.
Jiynda Túrkistan oblysynyń ákimi Janseiit Túimebaev Elbasynyń maqalasynda aitylǵan mindetterdi oryndaýǵa bailanysty óńirde atqarylǵan jumystardy baiandap, aldaǵy ýaqytta iske asyrylatyn jobalarmen tanystyrdy.
«Memleket basshysynyń «Uly Dalanyń jeti qyry» atty tarihi maqalasy el sanasyna qozǵaý salǵan, «Máńgilik El» bolý jolyndaǵy uly mindetterdi aiqyndap bergen, «Bolashaqqa baǵdar: rýhani jańǵyrý» baǵdarlamalyq maqalasynyń jalǵasy, ári eldi biik maqsattarǵa jeteleitin mańyzdy qujat. Osy qundy Baǵdarlamadaǵy tapsyrmalardy oryndaý maqsatynda Túrkistan oblysynda birqatar jumystar qolǵa alynyp, qarqyndy júzege asyrylýda. Máselen, atbegilikti, ańshylyqty, salt-dástúrdi nasihattaý maqsatynda oblysta arnaiy festivalder uiymdastyrylýda. Sondai-aq, «Qyzyl kitapqa» engen, iaǵni airyqsha qorǵaýdy qajet etetin qyzǵaldaq gúlin qorǵaý jáne sol aimaqtyń týristik áleýetin kóterý maqsatynda halyqaralyq «Qyzǵaldaq» sharasy qolǵa alyndy. Elbasymyzdyń aitýly maqalasynyń «Túrki áleminiń besigi» dep atalatyn bóliminde Túrkistan qalasynda týǵan Iasaýi babamyz ben Otyrardan túlep ushqan Ál-Farabi ǵulama týraly da aityldy. Bul baǵytta da tarihi tulǵalar men kóne qalalardy nasihattaý úshin animatsiialyq filmder men telehikaialar túsirildi. Aldaǵy ýaqytta qoǵamdyq sanany jańǵyrtý baǵdarlamasyn júzege asyrý baǵytynda jańasha jobalardy qolǵa alýdy josparlap otyrmyz», – dedi Janseiit Qanseiituly.
Sondai-aq, oblys ákimi 2019 jyly Túrkistan oblysynda «Sáigúlikter» festivali uiymdastyrylatynyn aitty. Ulttyq kodty jańǵyrtý maqsatynda ótkiziletin shara aiasynda ulttyq at sport oiyndary: teńge alý, aýdaryspaq, qyz qýý, jamby atý, sáigúlikter sherýi, sondai-aq at ábzelderi, attyly jaýyngerlerdiń kiimi men qarý-jaraqtaryna arnalǵan kórmeler, jylqy malyna bailanysty jyr músháirasy, jyrshylar men termeshiler baiqaýy ótedi dep josparlanýda. Sonymen qatar, «Shyǵys bazary» atty festival ótkizý josparǵa qoiylǵan. Ondaǵy maqsat qola, mys, temir, kúmis, altynnan jasalǵan áshekei buiymdar, turmystyq zattar men qarý-jaraqtardyń jármeńkesi ótkizý arqyly qazaq jeri – metallýrgiia paida bolǵan alǵashqy ortalyqtyń biri ekenin pash etý.
Odan bólek, Q.A.Iasaýidiń tarihi bolmysyn jahanǵa óz deńgeiinde tolyq tanytyp, nasihattaý maqsatynda birqatar sharýalar atqarylmaq. Atap aitqanda, Elbasy tapsyrmasy boiynsha, jańa Túrkistanda Iasaýi mýzeii salynbaq. Bul murajaida ǵulama men onyń shet memleketterdegi shákirtteriniń eńbekteri qoiylady. Iaǵni, Iasaýi fenomenin joǵarylatyp, atyn asqaqtatý arqyly ǵylymdy ǵana emes, týrizmdi de damytý múmkindigi ashyla túsedi. Sondai-aq, Túrkistan qalasynda álemniń túkpir-túkpirinde Iasaýi babanyń ǵylymi murasyn zerttep júrgen iasaýitanýshylardyń basyn qosyp, halyqaralyq konferentsiia ótkizý mejelengen. Iasaýi muralary keshendi túrde zerttelip, derekti jáne kórkem filmder túsiriledi.
Atqarylǵan jumystar men josparǵa qanyqqan Áset Órentaiuly sharýany shirata túsip, kestege sai jumys isteýdi tapsyrdy.
