QR ulttyq ekonomika ministri Timýr Súleimenov AQSh-tyń Reseige qarsy sanktsiiasy teńge baǵamyna qalai áser etetinin aitty, dep habarlaidy Sputnik Qazaqstan tilshisi.
"6 sáýirde sanktsiia jariialanǵanan keiin birinshi saýda kúni bul barlyǵyna keri áser etti. "RÝSAL" aktsiialary edáýir qulady. Reseilik rýbldiń edáýir ózgergenin baiqap otyrmyz. Birinshiden, bizdiń ekonomikamyzǵa áserin baǵalaý úshin aldaǵy eki-úsh kúnde jaǵdai qalai órbitinin kórýimiz qajet. Sizder bilesizder, naryqta bul qobaljý týǵyzdy. Onyń ústine keibir máseleler saiasatpen bailanysty. Sondyqtan, eń áýeli, Reseide qalai damitynyn baǵamdaýymyz kerek. Eger rýbl júieli túrde álsirese, onda belgili bir áserin tigizetin shyǵar", — dedi ministr.
Súleimenov qazir ministrlik ulttyq bankpen jumys júrgizip jatqanyn atap ótti.
"Qazir premer-ministrdiń tóraǵalyǵymen ekonomikalyq saiasat boiynsha keńes ótip jatyr. Onda bul másele de qaralady. Qazirgi tańda Reseidegi jaǵdai qanshalyqty júieli sipatqa ie bolatynyn anyqtap, sodan keiin bizdiń ekonomikaǵa baǵa berýge bolady", - dedi ol.
Ministr Reseige jariialanǵan sanktsiiadan keiin aiyrbas pýnkterinde teńge baǵamynyń ózgerýi devalvatsiiaǵa jatpaitynyn atap ótti.
Aita ketsek, AQSh Reseidiń birqatar iri biznesmenderi men joǵary shendi sheneýnikterin, birqatar kompaniiasyn sanktsiialyq tizimge engizgen bolatyn. Osynyń saldarynan rýbl quldyrap, reseilik kompaniialardyń aktsiialary arzandap ketti.
Búgin ulttyq valiýta baǵamy bir dollarǵa shaqqanda 324,62 teńgeni qurady. 9 sáýirdegi tańǵy sessiianyń qorytyndysy boiynsha bir dollar 320,11 teńge bolǵan edi.
