Roza Káribjanova QR Mádeniet jáne sport ministrliginiń Mádeniet komitetiniń tóraǵasy bolyp taǵaiyndaldy. Bul týraly QR Premer-Ministriniń baspasóz qyzmeti habarlady.
Mádeniet jáne sport ministriniń buiryǵymen Roza Samidollaqyzy Káribjanova Qazaqstan Respýblikasy Mádeniet jáne sport ministrliginiń Mádeniet komitetiniń tóraǵasy qyzmetine taǵaiyndaldy.
Roza Káribjanova 1964 jyly Torǵai oblysynda dúniege kelgen.
Qaraǵandy memlekettik ýniversitetin, Eýraziia gýmanitarlyq institýtyn, QR Prezidenti janyndaǵy Memlekettik basqarý akademiiasynyń Ulttyq memlekettik saiasat mektebin bitirgen.
Eńbek jolyn 1986 jyly Torǵai oblysy Qima aýdany Úki OM tarih pániniń muǵalimi, tárbie isi jónindegi meńgerýshisi bolyp bastady.
1988-1991 jyldary — Qima aýdandyq komsomol komitetiniń ekinshi hatshysy, Qazaqstan LKJO Torǵai oblystyq komitetiniń hatshysy.
1991-1994 jyldary — Semei oblystyq jastar isi jónindegi komitetiniń uiymdastyrý bóliminiń jetekshi mamany, basshysy.
1994-2000 jyldary — Semei oblystyq jastar isi, týrizm jáne sport basqarmasynyń, Semei qalasy Jastar, týrizm jáne sport komitetiniń bas mamany, Semei qalasy bilim, jastar jáne sport basqarmasynyń tárbie jumysy jáne jastar saiasaty bóliminiń basshysy.
2000-2003 jyldary — QR Mádeniet jáne qoǵamdyq kelisim ministrliginiń Muraǵattar men qujattamany basqarý komitetiniń jetekshi, bas mamany, bólim basshysy.
2003-2008 jyldary — QR Premer-Ministri Keńsesiniń Áleýmettik-ekonomikalyq bóliminiń bas sarapshysy.
2008-2014 jyldary — Qazaqstan Respýblikasy Mádeniet ministrliginiń Mádeniet komiteti tóraǵasynyń orynbasary.
2014-2016 jyldary — Qazaqstan Respýblikasy Bilim jáne ǵylym ministrliginiń Jastar isi jónindegi komitetiniń tóraǵasy, Jastar saiasaty departamentiniń direktory.
2016-2019 jyldary — QR Aqparat jáne qoǵamdyq damý ministrliginiń Ishki ákimshilendirý departamentiniń direktory.
2019-2020 jyldary — «Rýhani jańǵyrý» qazaqstandyq qoǵamdyq damý institýty» KEAQ Basqarma tóraǵasynyń orynbasary.
2020 jylǵy qarashadan bastap qazirgi ýaqytqa deiin QR Prezidenti Ákimshiliginiń Ishki saiasat bóliminiń sektor meńgerýshisi bolyp jumys istedi.
