Elordada Roza Baǵlanovanyń 100 jyldyq mereitoiyna arnalǵan «Qazaqtyń qaharman qyzy» atty saltanatty kontsert ótti, dep habarlaidy QazAqparat «Qazaq áýenderi» AQ-ǵa silteme jasai otyryp.
Kontsertte Roza Rymbaeva, Tamara Asar, Renat Ǵaisin, Jubanysh Jeksen, Aigúl Qosanova, Zarina Altynbaeva, Ámire, Rýhiia Baidúkenova, Janet (Belarýs), Hýlkar Abdýllaeva (Ózbekstan), Mirbek Atabekov (Qyrǵyzstan) jáne ózge de tanymal ártister óner kórsetti.
Sonymen birge dańqty tulǵanyń nemeresi, on jasar Úrbibi Baǵlanova da sahnaǵa kóterildi. Aita keteiik, Roza Baǵlanovanyń azan shaqyrylyp qoiǵan negizgi esimi - Úrbibi bolǵan.
Sondai-aq kontsertke ánshiniń uly Tájen men kelini Maral, R.Baǵlanovamen birge 24 jyl etene qyzmet etken prodiýser Qýanysh Ábdiqalymov ta keldi.
Kontserttiń betashar sózinde Mádeniet jáne sport ministri Dáýren Abaev IýNESKO deńgeiinde toilanatyn tulǵalar tizimine engen dańqty ánshiniń ǵasyrlyq toiy resmi túrde bastalǵanyn airyqsha atap ótti.
Aldaǵy ýaqytta Qyzylorda, Almaty, Máskeý qalalarynda mereitoilyq kontsertter jáne Nur-Sultan qalasynda Halyq qaharmany Roza Baǵlanova atyndaǵy halyqaralyq vokaldyq konkýrs uiymdastyrylmaq. Ánshiniń 100 jyldyǵy IýNESKO-nyń Parij qalasyndaǵy shtab páterinde atalyp ótedi.
Roza Tájibaiqyzy - Halyq qaharmany ataǵyna ie bolǵan Qazaqstandaǵy jalǵyz ánshi. Ol ómiriniń 70 jyldan astam ýaqytyn sahnada ótkizip, álemniń 50-den asa elinde boldy, 25 tilde án aitty.
