Tanymal boksshylar kishi Roi Djons pen Vasilii Lomachenko, sondai-aq faiter Qýat Hamitov Gennadii Golovkin men Saýl Alvares arasyndaǵy úshinshi jekpe-jek týraly pikirin aitty, - dep habarlaidy Tengrinews.kz tilshisi Vesti.kz saiyna silteme jasap.
Kishi Roi Djons Golovkinniń keremet karerasy bolǵanyn aityp, oǵan sáttilik tiledi.
"Golovkin qolynan kelgenniń bárin kórsetti. Dese de, jasy da áser etedi. Ol qarsylasyn jeńýge tyrysty, biraq qolynan kelmedi. Meniń oiymsha, bastapqyda ol Andre Ýordpen kezdesse jaqsy bolar edi, biraq ol Kanelony tańdady. Sol úshin ony qurmetteý kerek. Onyń kásipqoi bokstaǵy karerasy keremet boldy, men oǵan ómiriniń kelesi kezeńinde barlyq jaqsylyqty tileimin", - dedi kishi Roi Djons "Match TV" arnasyna.
Ýkrainalyq boksshy Vasilii Lomachenko da Gennadiidiń jasyn atap ótti.
"Bul óte qyzyq boldy. Tarihi sát boldy. Trilogiia boldy. Kanelo myqty boldy, biraq Gennadii tym qartaiǵan shyǵar. Meniń oiymsha, Kanelo Bivolmen revansh ótkizýi múmkin. GGG-ge kelsek, bilmeimin. Bul - onyń sheshimi. Ol qazir ańyzǵa ainaldy. Karerasyn aiaqtaýy múmkin", - dedi Lomachenko FightSpace YouTube-arnasyna bergen suhbatynda.
Qýat Hamitov te jerlesin maqtady.
"Gennadii Golovkin - shyn ómirde Rokki Balboa! 40 jasynda eń úzdik boksshyǵa 12 raýnd qarsy turý - erlik! Búgingi jekpe-jekti kórgennen keiin synym durys ekenin túsindim, óitkeni Golovkin bes jyl buryn salmaq qosyp, barlyq belbeýdi Alvareske deiin jinap ala alar edi, biraq, ókinishke qarai, bulai bolmady. Qalai bolǵanda da, ol tarihta qaldy. Chempionǵa qurmet, ol qazaqstandyq kásipqoi bokstyń pioneri jáne atasy bolyp qala beredi", - dep jazdy Naiman Instagram-paraqshasynda.
Trilogiia 18 qyrkúiekte Las-Vegasta ótip, Alvares tóreshilerdiń biraýyzdan sheshimimen jeńgen bolatyn.
