Iran prezidenti Hassan Roýhani Niý-Iorkte BUU Bas assambleiasynyń sessiiasynda sóilep, óziniń aldynda sóilegen AQSh prezidenti Donald Tramptyń sózderine jaýap berdi. Roýhani Trampty AQSh-tyń ózine alǵan mindettelemelerin buzdy dep aiyptap, basqa memleketterdi 2015 jyly Tegeranmen jasasqan iadrolyq kelisimnen shyǵýǵa májbúrlep otyrǵan "janjalqoi" dep atady.
Roýhani BUU Bas assambleiasynyń sessiiasynda Vashingtonnyń atalǵan kelisimnen shyǵýy men "AQSh-tyń óz betimen sanktsiia salýy" "ekonomikalyq terrorizmniń" bir túri dep atady.
Iran prezidenti keibir álem elderi basshylarynyń "ekstremizmdi, násilshildik pen natsistik áreketterge uqsas ksenofobiialyq tendentsiialardy qoldai otyryp sailaýshylar daýsyn ielenetinine" ókinetinin bildirdi. Roýhanidiń sózinshe, mundai basshylar "ǵalamdyq tártipti belden basyp, halyqaralyq institýttarǵa nuqsan keltiredi".
Tramptyń sózine NATO-ǵa múshe ózge eki el - Túrkiia men Frantsiia prezidentteri qarsy shyqty. Túrkiia prezidenti Rejep Taiyp Erdoǵan saýda kelisiminen óz betimen shyǵýǵa, protektsionizm saiasatynyń taralýyna jáne ekonomikalyq sanktsiialardy qarý retinde qoldanýǵa kóz juma qaramaýǵa shaqyrdy.
Frantsiia prezidenti Emmanýel Makron Iran máselesinde "dialog pen kópjaqtylyq saiasatyn" ustaný keregin málimdedi. Onyń sózin basqa el basshylary Tramptyń Iranǵa qarsy qatań sanktsiialar salýǵa shaqyrǵanyna astarly jaýap retinde qabyldady. Makron tribýnada turyp "Iran máselesin shynaiy turǵyda sheshýdiń sońy qandai bolady jáne ony retteýge ne kósektesti?" dep surady. Onyń sózinshe, "kúshtiniń ústemdigi" men "birjaqty qysym" jasaý máseleni ońtaily sheshýge kómektespeidi.
"Irannyń iadrolyq qarýdy jetildirýge qadam jasaǵanyn bilemiz, biraq 2015 jyly Venada jasalǵan kelisim onyń bul áreketin toqtatty. Qazir biz aimaqtyq shielenisti odan ary ýshyqtyrmaýymyz kerek, odan da dialog ornatyp, Iran máselesin kópjaqty kelisimmen sheshken jón" dedi Frantsiia prezidenti.
