2018 jyly Reseige 26 myńnan astam qazaqstandyq kóship barǵan. Resei federaldy memlekettik statistika qyzmeti jariialaǵan derekte osyndai málimet aitylady, dep jazady Azattyq.
Rosstat dereginshe, ótken jyly Reseige jarty millionnan astam azamat kóshken. Elge kelgen migranttar sany jaǵynan Ózbekstan alda keledi. Resei IIM aqparaty boiynsha, 2018 jyly migratsiialyq tirkeýge 4,5 million ózbek azamaty tursa, 3,25 million ózbek tirkeýden shyqqan. Al Reseige barý jaǵynan ekinshi orynda turǵan Tájikstannan ótken jyly elge 31 myńnan astam adam kelgen.
Degenmen Rosstat mamandary 2018 jyly migranttar sanynyń sońǵy bes jyldaǵy eń tómengi kórsetkishke túskenin aitady. Kóshi-qon aǵymynyń (kelýshiler men ketkender arasyndaǵy aiyrmashylyq) kórsetkishi 2005 jyldan bergi eń tómengi deńgeige deiin azaiǵan.
Máskeý memlekettik ýniversitetiniń oqytýshysy, ǵalym Olga Chýdinovskih RBK arnasyna bergen suhbatynda Resei migranttar úshin jaily el bolýdan qalyp barady dep aitqan. Munda sońǵy ýaqytta zańdy jumys isteý úshin beriletin patent quny qymbattap, ai saiyn memleketke tólenýi tiis tólem mólsheri kóbeigen.
2018 jyly elden 440 myń adam ketken. Bul - sońǵy jyldardaǵy eń joǵarǵy kórsetkish. Elden ketkender arasynda Resei azamattarymen qatar migranttar da bar.
