2018 جىلى رەسەيگە 26 مىڭنان استام قازاقستاندىق كٶشٸپ بارعان. رەسەي فەدەرالدى مەملەكەتتٸك ستاتيستيكا قىزمەتٸ جارييالاعان دەرەكتە وسىنداي مەلٸمەت ايتىلادى, دەپ جازادى ازاتتىق.
روسستات دەرەگٸنشە, ٶتكەن جىلى رەسەيگە جارتى ميلليوننان استام ازامات كٶشكەن. ەلگە كەلگەن ميگرانتتار سانى جاعىنان ٶزبەكستان الدا كەلەدٸ. رەسەي ٸٸم اقپاراتى بويىنشا, 2018 جىلى ميگراتسييالىق تٸركەۋگە 4,5 ميلليون ٶزبەك ازاماتى تۇرسا, 3,25 ميلليون ٶزبەك تٸركەۋدەن شىققان. ال رەسەيگە بارۋ جاعىنان ەكٸنشٸ ورىندا تۇرعان تەجٸكستاننان ٶتكەن جىلى ەلگە 31 مىڭنان استام ادام كەلگەن.
دەگەنمەن روسستات ماماندارى 2018 جىلى ميگرانتتار سانىنىڭ سوڭعى بەس جىلداعى ەڭ تٶمەنگٸ كٶرسەتكٸشكە تٷسكەنٸن ايتادى. كٶشٸ-قون اعىمىنىڭ (كەلۋشٸلەر مەن كەتكەندەر اراسىنداعى ايىرماشىلىق) كٶرسەتكٸشٸ 2005 جىلدان بەرگٸ ەڭ تٶمەنگٸ دەڭگەيگە دەيٸن ازايعان.
مەسكەۋ مەملەكەتتٸك ۋنيۆەرسيتەتٸنٸڭ وقىتۋشىسى, عالىم ولگا چۋدينوۆسكيح ربك ارناسىنا بەرگەن سۇحباتىندا رەسەي ميگرانتتار ٷشٸن جايلى ەل بولۋدان قالىپ بارادى دەپ ايتقان. مۇندا سوڭعى ۋاقىتتا زاڭدى جۇمىس ٸستەۋ ٷشٸن بەرٸلەتٸن پاتەنت قۇنى قىمباتتاپ, اي سايىن مەملەكەتكە تٶلەنۋٸ تيٸس تٶلەم مٶلشەرٸ كٶبەيگەن.
2018 جىلى ەلدەن 440 مىڭ ادام كەتكەن. بۇل - سوڭعى جىلدارداعى ەڭ جوعارعى كٶرسەتكٸش. ەلدەن كەتكەندەر اراسىندا رەسەي ازاماتتارىمەن قاتار ميگرانتتار دا بار.
