Premer-Ministrdiń orynbasary Roman Skliar elimizdegi asyl tuqymdy mal sharýashylyǵyn qoldaýǵa qatysty pikir bildirdi, dep habarlaidy "Ult aqparat".
«Asyl tuqymdy mal sharýashylyǵyn qoldaý jeńildetilgen sharttarmen kredit berý tetikteri arqyly da, sýbsidiialaý arqyly da júzege asyrylady. Atap aitqanda, satyp alynǵan asyl tuqymdy janýarlardyń qunyn jáne selektsiialyq asyl tuqymdyq jumystardy júrgizýge arnalǵan shyǵyndardy arzandatýdy sýbsidiialaý quraldary arqyly tómendetý, bul rette satyp alynǵan otandyq maldyń da, sheteldik maldyń da quny sýbsidiialanady», - delingen Úkimet basshysy orynbasarynyń depýtattar saýalyna bergen jaýabynda.
Onyń aitýynsha, taýarlyq jáne asyl tuqymdy maldyń importy otbasy úlgisindegi keńeitilip kele jatqan shaǵyn jáne orta fermerler klasyn malmen qamtamasyz etýge arnalǵan.
«Sheteldik selektsiianyń asyl tuqymdy IQM asyl tuqymdyq basyn ákelýdi sýbsidiialaý esebinen búgingi kúni asyl tuqymdy mal basynyń úlesi aitarlyqtai artyp, IQM jalpy basynyń kórsetkishi joǵaryda kórsetilgen 12,5%-dy qurady», - dedi R. Skliar.
Aita keteiik, Premer-ministrdiń orynbasary elimizdegi asyl tuqymdy mal basynyń sanyna qatysty túsinik berdi. Búgingi kúni asyl tuqymdy maldyń úles salmaǵy ósýiniń oń serpini saqtalýda. Mysaly, eger 2010 jyldyń 1 qańtaryna sharýashylyqtyń barlyq sanattaǵy asyl tuqymdy iri qara maldyń sany 344,1 myń bas bolsa nemese asyl tuqymdy maldyń jalpy mal basyna shaqqandaǵy úles salmaǵy 2,9% qurasa, 2021 jyldyń 1 qańtaryna sharýashylyqtyń barlyq sanatyndaǵy asyl tuqymdy IQM sany 978,6 myń basty qurady nemese asyl tuqymdy maldyń jalpy mal basyna shaqqandaǵy úles salmaǵy 12,5%-ǵa deiin ósti. Onyń ishinde negizgi mal basy qazaqtyń aqbas jáne áýliekól tuqymdaryna tiesili.
Budan buryn habarlanǵandai, Májilistiń jalpy otyrysynda depýtat Amanǵali Berdalin elimizdiń klimat ereksheligine beiimdelgen otandyq asyl tuqymdy mal sapasyn arttyrý máselesin kóterip, depýtattyq saýalyn Premer-Ministriniń orynbasary Roman Skliarǵa joldady.
