Terekti aýdany politsiia bólimi bastyǵynyń orynbasary jol apatyna sebepshi boldy. Oqiǵa ornynda bir adam qaitys boldy, taǵy ekeýi jaraqat aldy. Politsei rólge mas kúiinde otyrǵan, dep habarlaidy Sputnik Qazaqstan agenttigi "Moi gorod" portalyna silteme jasap.
Resmi málimetke sáikes, jol apaty 1 jeltoqsan kúni keshki saǵat 19:00-diń shamasynda bolǵan. Oral-Tasqala jolynyń 46-shy shaqyrymynda Lada Largus pen Hyundai Accent betpe-bet soqtyǵysty. Bireýin Terekti aýdanyna qaraityn aýyldyq politsiia bólimi bastyǵynyń orynbasary júrgizgen.
Jol apaty kezinde bir adam oqiǵa ornynda kóz jumdy. Budan bólek, taǵy eki adam jaraqat aldy.
"Bul – shekten shyqqan oqiǵan. Biz marqumnyń jaqyndaryna jáne týǵan-týystaryna úlken ókinishpen kóńil aitamyz. Qazirgi kezde qyzmettik tergeý sharalary bastaldy. Basshylarǵa qatysty tártiptik jaza qoldanylady. Al jol oqiǵasyn jasaǵan qyzmetker ishki ister organdarynan shyǵarylady", - deidi oblystyq politsiia departamenti bastyǵynyń orynbasary Nurlan Ramazanov.
Onyń aitýynsha, dál qazir Qylmystyq-protsessýaldyq kodekstiń 201-baby boiynsha oqiǵanyń mán-jaiyn jariialaýǵa bolmaidy. Alaida politsiia departamenti kúdiktiniń ishki ister organdarynda 20 jyl istep júrgenine qaramastan, zań boiynsha barlyq sharany qoldanady.
Qazirgi kezde rólge mas kúiinde otyrǵan politsei qamaýǵa alyndy.
