Foto: Aikyn.kz
Májilis depýtaty Rinat Zaiytov benzin endi arzandamaitynyn, sol sebepti halyqtyń qosymsha tabysyn arttyrý joldaryn qarastyrý kerek ekenin aitty, dep habarlaidy Sputnik Qazaqstan.
Onyń sózinshe, benzin men dizeldi otyn baǵasyn kóterý boiynsha depýtattar men Úkimet músheleri arasynda biraz tartys bolǵan.
"Janar-jaǵarmaidyń qymbattaýy boiynsha úlken tartys boldy. Árine, munyń bárin biz halyqqa kórsete bermeimiz. Sol tartysta kelgen mámilemiz bylai: eger qazir Úkimet aityp otyrǵandai, egis naýqanynda tapshylyqqa tap bolsaq, onda mundai jaýapkershilikti kim moinyna alady? Bul rette bizdiń depýtattar, árine, moiyndaimyz, Úkimettiń aldyndaǵy bizdiń sheginisimiz. Biraq biz halyqtyń múddesin qorǵap otyrǵandyqtan, endi osynyń esesin basqa jaqtan qaitarýǵa umtylýymyz kerek", - deidi Zaiytov.
Depýtattyń pikirinshe, munyń jalǵyz joly – halyqtyń tabysyn arttyrý.
"Basqa sheshimi joq. Óitkeni Úkimettiń aityp otyrǵany jartylai bolsyn ras bolsa, munyń sheshimi endi arzandamaidy degen sóz. Oǵan daiyn bolý kerek. Biraq qosymsha tabysty arttyrý joldaryn izdeý qajet. Bostan bosqa áńgime qýalap, "oibai, benzindi arzandataiyq" dep aiǵailai bergennen góri, basqa jaqtan utýǵa tyrysýymyz kerek. Biz bul jerden oǵan áser ete almaitynymyzdy birden aitaiyn", - dep túsindirdi májilismen.
Úkimet baǵanyń kóterilýin otandyq janarmaidyń shet elderge tonnalap shyǵarylýymen túsindirgen edi. Rinat Zaiytovtyń pikirinshe, buǵan tosqaýyl qoiý úshin Ulttyq qaýipsizdik komitetiniń shekara qyzmetiniń jumysyn qatań qadaǵalaý kerek, "Bul - Ulttyq qaýipsizdik komitetiniń shekara qyzmetine úlken syn. Tek qana bul emes, keshegi general Kúdebaevtyń qashyp ketýi de - UQK shekara qyzmetiniń jumysyn qatty qadaǵalaýǵa alý kerek degen sóz", dep sanaidy ol.
Zaiytov eldegi tapshylyqqa jol bermeý úshin janarmai baǵasyn ósirýden basqa sheshim joq deidi.
"Shekarany tas qylyp jaýyp tastai almaidy ǵoi. Óitkeni biz alys-jaqyn kórshilerden taýar satyp alyp, shekaradan ótkizip otyrmyz, tars jaýyp tastamaǵan soń, ol báribir shyǵa beredi. Bizdiń eldiń azamattary da ońai jolmen baiyp ketýdi kózdeidi. Janarmaidy shetelge tasyp jatqandardyń bári Resei azamattary emes shyǵar, óz azamattarymyz da bolýy múmkin. Olar da elimizde erteń tapshylyq bolyp qalmai ma dep oilanbai jatyr ǵoi", - deidi Zaiytov.
Aita keteri, sáýir aiynan bastap AI-92 jáne AI-93 markaly benzin baǵasy litrine 205 teńgeden, dizel otyny litrine 295 teńgeden satylady.
