Foto: t.me/mazhilis_kz
QR Bas prokýrory Berik Asylovqa joldaǵan depýtattyq saýalynda Rinat Zaitov onlain alaiaqtyq faktileri halyqty qanap jatqanyn aitty, dep habarlaidy Ult.kz.
– Ózińiz jaqsy biletindei, adamzat balasy jahandanyp, jańarǵan kezeńde táýelsizdigin endi qolǵa alyp, etek-jeńin jinai bastaǵan Qazaqstan buryn estip-bilmegen talai jańashyldyqqa tap boldy. Tiisti aqparaty men tájiribesi joq Qazaqstan halqyna ol jańashyldyqtar kóp ziiandy zardabyn tigizip jatyr.
Solardyń biri – "onlain alaiaqtyq". Jańa kezeńge jyldam beiimdelgen "jylpos" alaiaqtar kún saiyn qorǵansyz halyqtyń shotyndaǵy aqshasyn urlap qana qoimai, myńdaǵan adamnyń atyna syrttai nesie rásimdep, onsyz da zorǵa júrgen halyqty zarlatýda, – dep ashyndy halyq qalaýlysy.
Ókinishtisi sol, alaiaqqa aldanyp, san soǵyp qalǵan jurtshylyqqa qarasyp jatqan Úkimet te, bankter de joq. Bul – Rinat Zaitovtyń óz sózi. Sonymen qatar, kóptegen alaiaqtyq jasaý faktisinde ne bank, ne jergilikti organ ókilderiniń qatysýymen bolǵany dáleldenip otyr.
– Mysaly, Qaraǵandy qalasynyń jumyspen qamtý jáne áleýmettik qorǵaý basqarmasynyń qyzmetkeri múgedektigi bar, zeinettegi jiyny 90 adamnyń shotyndaǵy aqshany jymqyrǵan, Taldyqorǵan, Astana, Almaty qalalarynda da bank qyzmetkerleriniń azamattardyń jeke málimetine qol jetkizýge kómekteskeni jóninde faktiler anyqtalǵan.
Dálelmen aitsaq, Respýblika kóleminde biylǵy jyldyń qańtar, aqpan ailarynyń ózinde ǵana kiberalaiaqtyqpen bank qyzmetkerlerine qatysty QR Qylmystyq Kodeksiniń 250-baby (Ókilettikterdi teris paidalaný) boiynsha – 15 is, al QR Qylmystyq Kodeksiniń 254-baby (Mindetterine adal qaramaý) boiynsha – 17 is qozǵalǵan.
Bir túsiniksizi bul kiberqylmystan qorǵaýǵa, azamattardyń shottarynyń qaýipsizdigin saqtaýǵa mindetti bankterge eshqandai jaýapkershilik júktelmegen. Osy ádiletti me? Biz olai oilamaimyz, – dep sózin jalǵady Rinat Zaitov.
Alaiaqqa qolyndaǵy baryn bergen el-jurtty bank taǵy "buryshqa" taqaidy. Iaǵni, shotyn buǵattap, qarjylyq qiyndyǵy odan saiyn ulǵaia beredi.
– Sál qinalsa, memleketten milliardtap qarjyny qaitarymsyz alatyn, oiyna kelgen paiyzdyń ólshemin taǵaiyndap, óz qatelikterine jaýap berýden jaltaratyn qairymsyz bankter qashanǵa deiin tairandamaq? Naqaqtan-naqaq qaryzǵa batqan halyqty qorǵaityn ýaqyt keldi ǵoi. Ata zańymyz boiynsha memlekettiń basty bailyǵy Bank emes, "Halyq" ekenin esińizgi salaiyn, – dep bir toqtady depýtat Bas prokýrorǵa qarata.
Rinat Zaitovtyń aitýynsha, ekinshi deńgeilik bankter kiberalaiaqtardyń qylmystyq is-áreketterinen zardap shekken azamattardyń banktik shottaryn buǵattan shyǵarýdy jáne de bul sanattaǵy adamdardyń shottaryn buǵattaýǵa tiym salý sharalaryn qarastyrýy kerek. Sondai-aq, shottaryndaǵy qarjynyń saqtalýyna jaýapty bankter bolǵandyqtan, kiberalaiaqtyqtan kelgen zardap pen barlyq shyǵyndardy bankter óz tarapynan óteý mindetin júkteýi tiis.
